عمران خان آج انسداد دہشتگردی عدالت میں پیش ہونگے

تفصیلات کے مطابق خاتون مجسٹریٹ  اور  سینئر  افسران کو دھمکیاں دینے کے کیس میں درخواست ضمانت پر سماعت آج ہوگی ، چئیرمین پی ٹی آئی اور سابق وزیراعظم  عمران خان آج انسداد دہشتگردی عدالت میں پیش ہوں گے ۔ کیس کی سماعت انسداد دہشتگردی عدالت کے جج راجہ جواد عباس کریں گے۔ 

عمران خان کے وکیل بابر اعوان ضمانت قبل از گرفتاری کی درخواست پر دلائل د یں گے۔

 خیال رہے کہ انسداد دہشت گردی عدالت نے ایک لاکھ روپے کے ضمانتی مچلکوں کے عوض عمران خان کی عبوری ضمانت منظور کی تھی ۔

عدالت نے  پولیس کو یکم ستمبر تک سابق وزیر اعظم عمران خان کو گرفتار کرنے سے روک رکھا ہے۔ 

واضح رہے کہ 20  اگست کو پاکستان تحریک انصاف کے چیئرمین عمران خان نے شہباز گل پر مبینہ تشدد کے خلاف آئی جی اور ڈی آئی جی اسلام آباد پرکیس کرنےکا اعلان کیا تھا اور دوران خطاب عمران خان نے شہباز گل کا ریمانڈ دینے والی خاتون مجسٹریٹ زیبا چوہدری کو نام لےکر دھمکی بھی دی تھی ۔

اسلام آباد ہائی کورٹ نے توہین عدالت کیس میں انہیں  شوکاز نوٹس جاری کرتے ہوئے  انہیں ذاتی طور پر بھی طلب کیا تھا۔

 گزشتہ روز سماعت کے دوران عدالت نے ان کے جواب  کو غیر تسلی بخش قرار دیتے ہوئے انہیں 7 روز میں دوبارہ جواب جمع کرانے کا حکم دیا ۔