لیجنڈ اداکار عابد علی کی تیسری برسی

پاکستان کے مایہ ناز اداکار عابد علی مارچ 1952 میں کوئٹہ میں پیدا ہوئے اور ابتدائی تعلیم بھی کوئٹہ سے حاصل کی ۔  اداکار عابد علی نے ریڈیو پاکستان سےاپنے فنی کیرئیر کا آغاز کیا بعدازاں 1973 میں پاکستان ٹیلی ویژن سے منسلک ہو کر جھوک سیال میں اداکاری کے جوہر دکھائے۔ 

انہیں امجد اسلام امجد کے قلم بند کئے گئے ڈرامہ وارث سے شہرت حاصل ہوئی، ان کے مقبول ڈراموں میں پیاس،دوریاں،مہندی،دیار دل اور دیگر شامل ہیں۔

اداکار نے 1993 میں ڈرامہ سیریل دشت سے ہدایت کاری کا آغاز کیا۔

انہوں نے 70 سے 90 کی دہائی تک پی ٹی وی کے کئی مقبول ڈراموں میں کام کیا ،  ان کی فنی خدمات کے پر انہیں 1985ء میں پرائڈ آف پرفارمنس سمیت متعدد ایوارڈز سے بھی نوازا گیا۔

اداکار عابد علی نے دو شادیاں کی تھیں ، ان کی پہلی بیوی کا نام حمیرا علی ہے جن سے  ان کی تین بیٹیاں ایمان، راحمہ اور مریم علی ہیں جبکہ عابد علی نے اداکارہ رابعہ نورین سے 2006 میں دوسری شادی کی تھی۔

عابدعلی  جگر کے سرطان میں مبتلا  تھے ، انہیں  سانس کی تکلیف کے باعث 30 اگست کو کراچی کے نجی ہسپتال منتقل کیا گیا تھا  تاہم وہ جانبر نہ ہو سکے۔ وہ  5 ستمبر کو دنیائے فانی سے کوچ کرگئے  لیکن  اپنی جاندار اداکاری کی وجہ سے ہمیشہ اپنے چاہنے والوں    کے دلوں میں زندہ رہیں گے۔