عالمی برادری ریاستی دہشتگردی میں ملوث عناصر کو کٹہرے میں لائے : وزیرخارجہ

دہشت گردی کے متاثرین کی اقوام متحدہ کی پہلی عالمی کانگریس کے  اعلیٰ سطح کے وزارتی اجلاس سے خطاب میں  وزیرخارجہ بلاول بھٹو  نے کہا کہ ہمیں دہشتگردی اور حق خود ارادیت کی جائز جدوجہد کے درمیان فرق کرنا ہو گا۔

وزیر خارجہ نے کہا کہ ہمیں ریاستی دہشتگری خصوصاً غیر ملکی قبضے اور انسداد دہشتگردی کی کارروائیوں کے نام پر قابض افواج کی طرف سے مقبوضہ علاقوں کے لوگوں پر طاقت کے ظالمانہ استعمال کو روکنا ہو گا۔

انہوں نے کہا کہ حالیہ دو دھائیوں کے دوران پاکستان بدترین دہشتگردی کا نشانہ بنا رہا۔ اس کے نتیجے میںاسی ہزار افراد کی ہلاکت ہوئی اور ملکی معیشت کو ایک سو پچاس ارب ڈالر سے زائد کا نقصان ہوا۔

بلاول بھٹو زرداری نے کہا کہ ہمیں دہشتگردی کی ایک متفقہ تعریف وضع کرنا ہوگی اور نئے اورابھرتے خطرات کا مقابلہ کرنا ہو گا۔انہوں نے بھارت کے غیر قانونی زیر قبضہ جموں و کشمیر اور فلسطین کے عوام کو خراج تحسین پیش کیا جو بدترین قسم کی ریاستی دہشتگردی کا سامنا کر رہے ہیں۔

گلوبل کانگریس ایک دو روزہ اعلیٰ سطحی تقریب ہے جس کا اہتمام اقوام متحدہ کے دفتر برائے انسداد دہشت گردی (یو ای او سی ٹی) کررہا ہے ۔  کانگریس کا مقصد دہشت گردی کے متاثرین کے حقوق اور ضروریات کے بارے میں بیداری پیدا کرنا اور اس مسئلہ پر بات چیت کو فروغ دینا ہے۔ تقریب میں وزارتی سطح پر متعدد ممالک نے بھی شرکت کی۔