لاہور ہائیکورٹ ملتان بینچ نے 11 ستمبر کے ضمنی انتخابات روکنے پر الیکشن کمیشن سے جواب طلب کر لیا

 لاہور ہائیکورٹ ملتان بینچ میں الیکشن کمیشن کی جانب سے 11 ستمبر کو ضمنی انتخابات روکنے کے فیصلے کے خلاف درخواست پر سماعت ہوئی،لاہور ہائیکورٹ ملتان بینچ نے چیف الیکشن کمیشن سے 13 ستمبر تک جواب طلب کر لیا۔ میڈیا رپورٹس کے مطابق لاہور ہائیکورٹ ملتان بینچ نے قرار دیا کہ ملتان میں کوئی سیلاب نہیں،الیکشن ملتوی کرنے کی وجوہات بتائی جائیں؟اگر تفصیلی جواب جمع نہیں ہوتا تو عدالت فیصلہ کرے گی۔ 

درخواست گزار وکیل علی صدیقی نے کہا کہ سیٹ خالی ہونے پر 60 روز میں الیکشن کرانا انتہائی ضروری ہے،20 ستمبر کو 60 روز مکمل ہوجائیں گے لیکن الیکشن کمیشن نے انتخاب روک دیا۔ یاد رہے کہ گزشتہ روز ملک بھر میں 13 حلقوں میں ضمنی انتخابات کی پولنگ تاریخوں کو ملتوی کیا گیا،11، 25 ستمبر اور 2 اکتوبر کو ضمنی انتخابات کیلئے پولنگ ہونی تھی،سیلاب کی تباہ کاریوں اور لوگوں کی نقل مکانی کے باعث الیکشن ملتوی کیے گئے ہیں۔ 

الیکشن کمیشن آف پاکستان نے ملک بھر میں 13حلقوں میں ضمنی انتخابات کی پولنگ تاریخوں کو ملتوی کردیا، ملک میں11، 25 ستمبر اور 2 اکتوبر کو ہونے والے ضمنی انتخابات کی پولنگ تاریخیں ملتوی کی گئیں، ضمنی انتخابات کی صرف پولنگ کی تاریخوں کو ملتوی کیا گیا، ضمنی الیکشن کے باقی مراحل شیڈول کے مطابق ہوں گے۔ بتایا گیا ہے کہ انتخابات کے دوران سکیورٹی فرائض اور دیگر انتظامات کرنے والے ادارے سیلاب متاثرین کی امداد میں مصروف ہیں، اس لیے سیلاب کی تباہ کاریوں کی وجہ سے الیکشن ملتوی کیے گئے ہیں۔ 

خیبرپختونخواہ میں دہشتگردی کے واقعات ہوئے ہیں جبکہ لوگوں کی بڑے پیمانے پر نقل مکانی بھی ہوئی ہے اس لیے بھی الیکشن نہیں ہوسکتا۔ بتایا گیا ہے کہ ضمنی الیکشن کے باقی مراحل الیکشن شیڈول کے مطابق مکمل ہوں گے۔