وزیر اعظم کی ازبکستان کے صدر سے ملاقات، دوطرفہ تعلقات پر تبادلہ خیال 

تفصیلات کے مطابق دونوں رہنمائوں کے درمیان ملاقات میں دوطرفہ تعلقات اور باہمی دلچسپی کے امور پر تبادلہ خیال کیا گیا۔ یہ ملاقات شنگھائی تعاون تنظیم کے سربراہان مملکت کے سالانہ اجلاس کے موقع پر سمرقند میں ہوئی ۔

اس موقع پر وزیر خزانہ مفتاح اسماعیل ،وزیر خارجہ بلاول بھٹو زرداری اور وزیر دفاع خواجہ محمد آصف بھی وزیر اعظم کے ہمراہ تھے۔ 

اس سے قبل وزیر اعظم محمد شہباز شریف  آج ازبکستان کے دورے کے موقع پر ہوائی اڈے سے سیدھے سمرقند میں حضرت خضر کمپلیکس گئے اور ازبکستان کے بانی رہنما اسلام کریموف کے مزار پر حاضری دی ۔ اس موقع پر ازبکستان کی اعلی قیادت،وزیر دفاع خواجہ آصف اور وزیر خزانہ مفتاح اسماعیل بھی انکے ہمراہ تھے۔

واضح رہے کہ وزیر اعظم محمد شہباز شریف شنگھائی تعاون تنظیم کے سربراہانِ مملکت کے سالانہ اجلاس میں شرکت کیلئے دو روزہ دورے سمرقند پہنچے ہیں۔

وزیراعظم اپنے دورے میں وزیراعظم روسی صدر ولادیمیر پیوٹن سے ملاقات کریں گے ۔ وزیرِ اعظم ایرانی صدر ابراہیم رئیسی، بیلا روس کے صدر الیگزینڈر گریگوری-وچ لوکا-شینکو اور صدر کرغستان سیدر جاپاروف سے بھی علیحدہ علیحدہ ملاقاتیں کریں گے ۔

اسکے بعد وزیرِ اعظم ازبک صدر کی طرف سے سربراہانِ ممالک کے اعزاز میں دیئے گئے عشائیے میں شرکت کریں گے۔عشائیے کے بعد وزیرِ اعظم ترکیہ کے صدررجب طیب اردگان سے بھی ملاقات کریں گے۔