وزیراعظم شہباز شریف اورروسی صدر پوتن کی سمرقند میں اہم ملاقات

وزیراعظم پاکستان شہباز شریف اور روسی صدرولادیمیر پوتن کے درمیان شنگھائی تعاون تنظیم کے سربراہی اجلاس کے سائیڈ لائن پر ملاقات ہوئی ہے۔
 اے پی پی نے وزیر اعظم آفس کے میڈیا ونگ سے جاری بیان کے حوالے سے کہا ہے مطابق دونوں رہنمائوں کے درمیان ملاقات میں دوطرفہ تعلقات اور باہمی دلچسپی کے امور پر تبادلہ خیال کیا گیا۔
یہ ملاقات شنگھائی تعاون تنظیم کے سربراہان مملکت کے سالانہ اجلاس کے موقع پر سمرقند میں ہوئی جو جمعرات اور جمعہ کو ہورہا ہے۔
اس سے پہلے شہبازشریف نے شنگھائی تعاون تنظیم (ایس سی او) کے سربراہی اجلاس کے موقع پر تاجکستان کے صدر امام علی رحمان سے ملاقات کی

اور دونوں ممالک کے درمیان قابل اعتماد اور تعمیری اعلیٰ سطحی رابطوں، بین الپارلیمانی روابط، دفاعی اور سکیورٹی تعلقات کو مزید مضبوط بنانے پر تبادلہ خیال اور خطے بالخصوص افغانستان میں امن، استحکام اور سلامتی کو مضبوط بنانے کے لیے مل کر کام کرنے پر اتفاق کیا۔

دونوں رہنماؤں نے علاقائی اور بین الاقوامی مسائل سمیت باہمی طور پر فائدہ مند دو طرفہ تعاون کے تمام پہلوؤں کا احاطہ کرتے ہوئے تفصیلی بات چیت کی۔

تاجک صدر امام علی رحمان نے پاکستان میں حالیہ سیلاب سے ہونے والی انسانی جانوں کے ضیاع اور تباہی پر گہری ہمدردی اور تعزیت کا اظہار کیا اور متاثرہ افراد کی امداد اور بحالی کی کوششوں میں تاجکستان کی جانب سے مکمل تعاون کا یقین کرائی۔