ترقی یافتہ ممالک موسمیاتی فنانس کے 100ارب ڈالرکی فراہمی کا وعدہ پوراکریں : اقوام متحدہ

اقوام متحدہ کے سیکرٹری جنرل  نے ان خیالات کا اظہار ایک ویڈیوپیغام میں کیاجس میں انہوں نے موسمیاتی تبدیلی کانفرنس میں مسائل کے حل کیلئے پیش رفت پر زور دیا ہے ۔

انتونیو گوتیریس نے کہا کہ مصر میں ہونے والی اقوام متحدہ کی موسمیاتی تبدیلی کانفرنس میں وسیع پیشرفت ہونی چاہیے اور ہمیں فوری طور پر موسمیاتی نقصانات کو بامعنی اور قابل اعتبار طریقے سے حل کرنے کی ضرورت ہے۔

انہوں نے کہا کہ الائنس آف سمال آئی لینڈ سٹیٹس نے طویل عرصے سے آب و ہوا کے حوالے سے کافی کام کیا ہے اور اب ہمیں ماحولیاتی مسائل حل کرنے کی پہلے سے کہیں زیادہ ضرورت ہے۔

انہوں نے کہا سیلاب سے پاکستان کا ایک تہائی حصہ ڈوب گیا ہے ، اگر ہم 1.5 ڈگری سے آگے بڑھ گئے تو ہم کئی ممالک کا خوفناک مستقبل کا تصور کر سکتے ہیں ۔ انہوں نے کہاکہ ہمیں کوپ 27 ہدف پر عالمی ردعمل کی ضرورت ہے، جس میں موسمیاتی تبدیلیوں کے باعث ہونے والے نقصان کی مالی اعانت بھی شامل ہے۔

سیکرٹری جنرل کا کہنا تھا کہ  ہم سب کو مل کر پھیلائی گئی آلودگی کی قیمت ادا کرنا ہوگی اور اس کے لئے ہمیں فنانس تک رسائی کی ضرورت ہے ، اقوام متحدہ قابل تجدید توانائی کے انقلاب کے ساتھ ساتھ ترقی یافتہ ممالک پر زور دیتا رہے گا کہ وہ ترقی پذیر ممالک کی مالی امداد کریں اور انہیں ٹیکنالوجی کی فراہمی یقینی بنائیں ۔

 انہوں نے کہا کہ ہم ترقی یافتہ ممالک کو100 بلین امریکی ڈالر کے موسمیاتی فنانس کے وعدے کو پورا کرنے کے لیے دباؤ ڈالتے رہیں گے۔