ایون فیلڈریفرنس : مریم نوازاور کیپٹن (ر) صفدر بری 

اسلام آباد ہائی کورٹ نے ایون فیلڈ ریفرنس کیس میں  ڈویژن بینچ نے جسٹس عامر فاروق کی سربراہی میں مریم نواز اور کیپٹن صفدر کی اپیلوں پر سماعت کی۔ مسلم لیگ ن کی رہنما مریم نواز اسلام آباد ہائیکورٹ میں پیش ہوئیں۔

 نیب پراسیکیوٹر عثمان جی راشد چیمہ آج عدالت میں طبیعت کی ناسازی کی وجہ سے پیش نہیں ہوئے، ان کی جگہ نیب کے ڈپٹی پراسیکیوٹر جنرل سردار مظفر عباسی نے دلائل مکمل کیے۔

اسلام آباد ہائیکورٹ نے  مریم نواز اور کیپٹن صفدر کی سزا کے خلاف اپیلیں منظور کرتے ہوئے ان کی 7سال قید کی سزا کالعدم قرار دے دی۔

فیصلے کے بعد عدالت کے باہر صحافیوں سے گفتگو میں مریم نواز کا کہنا تھا کہ آج نواز شریف سرخرو اور عمران خان ناکام ہو گئے ہیں۔

مریم نواز نے کیس کو جھوٹ قرار دیتے ہوئے کہا کہ جب یہ نواز شریف کے خلاف بنایا گیا تو ان کو کہا گیا کہ آپ کو استثنٰی ہے وہ لے لیں لیکن انہوں نے انکار کیا اور کیس کا سامنا کیا ۔

انہوں نے کہا کہ اسحاق ڈار جس وزیراعظم کے جہاز پر گئے تھے  اسی وزیراعظم کے جہاز پر واپس آئے البتہ جنہوں نے الزام لگایا اسی پارٹی کے صدر نے اسحاق ڈار سے حلف لیا۔   

انہوں نے ایک سوال کے جواب میں کہا کہ ’جلد نواز شریف بھی ملک واپس آئیں گے۔ میرے الیکشن لڑنے کا فیصلہ پارٹی قیادت کرے گی۔

ایون فیلڈ کیس : 

سال 2018 کے عام انتخابات سے صرف تین ہفتے قبل اسلام آباد کی احتساب عدالت نے مریم نواز کو نیب کے ایون فیلڈ کیس میں سات سال قید کی سزا سنائی تھی۔

اسی کیس میں احتساب عدالت نمبر ایک کے جج محمد بشیر نے مریم کے والد اور سابق وزیراعظم نواز شریف کو دس سال جبکہ کیپٹن ریٹائرڈ محمد صفدر کو ایک سال قید اور جرمانے کی سزا سنائی تھی۔

اس کے بعد مریم نواز کی اپیل پر اسلام آباد ہائی کورٹ نے انہیں ضمانت پر رہا کرنے کا حکم دیا تھا۔ 

مسلم لیگ ن کی رہنما مریم نواز اور دیگر نے ایون فیلڈ ریفرنس میں احتساب عدالت سے سنائی گئی سزا کو اسلام آباد ہائیکورٹ میں چیلنج کر رکھا تھا۔