مریم نواز کچھ دیر میں لندن کے لیے روانہ ہونگی

ذرائع کے مطابق  مسلم لیگ ن کی نائب صدر ایک ماہ لندن میں گزارنے کے بعد 6 نومبر کو پاکستان واپس آئیں گی ۔ مریم نواز کے ہمراہ ان کے شوہر کیپٹن ریٹائرڈ محمد صفدر اور ایک ملازمہ بھی لندن روانہ ہو گی ۔ 

مریم نواز 3 سال کے بعد اپنے والد نواز شریف سے بالمشافہ ملاقات کر سکیں گی  جبکہ  اپنے بھائیوں سے تقریبا 5 سال کے بعد ملیں گی۔

مریم نواز لندن میں اپنے والد سے تفصیلی سیاسی مشاورت بھی کرینگی۔ مریم نواز اپنے والد نواز شریف کی عیادت اور  ان کے علاج معالجے کی نگرانی بھی کرینگی۔

خاندانی ذرائع کا کہنا ہے کہ مریم نواز اپنے والد نواز شریف کے ہمراہ وطن واپس آنے کا امکان ہے۔

واضح رہے کہ لاہور ہائیکورٹ کے حکم کے بعد گزشتہ روز مریم نواز کو ان کا پاسپورٹ واپس مل گیا تھا۔ مریم نواز اپنا پاسپورٹ لینے لاہور ہائیکورٹ پہنچیں جہاں انہوں نے رجسٹرار کے کمرے سے اپنا پاسپورٹ وصول کیا۔