صدرِ مملکت نے سزائے موت پانے والے 5 مجرموں کی رحم کی اپیلیں مسترد کردیں

ایوان صدر کے مطابق صدر مملکت نے محمد شعبان ولد محمد انور کی رحم کی اپیل مسترد کردی، محمد شعبان کو تین سالہ بچی سے زیادتی اور قتل کرنے کے جرم میں سزائے موت سنائی گئی تھی۔

محمد عمران ولد فقیر محمد کی رحم کی اپیل بھی مسترد کردی گئی، محمد عمران نے گھریلو جھگڑے کے بعد اپنی بیوی اور دو بیٹیوں کو ٹوکے سے قتل کیا تھا۔

صدر مملکت نے محمد افضل ولد محمد اصغر علی کی اپیل بھی مسترد کردی ہے، محمد افضل کو والدین اور 6 بہن بھائیوں سمیت اپنے خاندان کے 8 افراد کو قتل کرنے پر سزائے موت سنائی گئی تھی۔

صدر ڈاکٹر عارف علوی نے محمد اکبر اور محمد اصغر ولد محمد اکرم کی رحم کی اپیل بھی مسترد کردی گئی، محمد اکبر اور محمد اصغر نے دو افراد کو معمولی جھگڑے کے بعد قتل کیا تھا۔

 صدر مملکت نے آئین کے آرٹیکل 45 کے تحت ان اپیلوں کو مسترد کیا ہے۔ آئین کے آرٹیکل 45 کے تحت صدر مملکت کسی بھی عدالت، ٹریبونل یا دیگر اتھارٹی کی طرف سے دی گئی سزائوں کو معاف کرنے، معطل کرنے یا کم کرنے کا اختیار رکھتے ہیں۔