سینیٹ میں شہریوں کو کوورنا ویکسین کی فراہمی سے متعلق قرارداد اکثریت رائے سے منظور

تفصیلات کے مطابق سینیٹ میں شہریوں کوکوروناویکسین کی مفت فراہمی سے متعلق قرارداد منظورکرلی گئی،قرارداد کے حق میں 43 اور مخالفت میں 31 ووٹ آئے،قرارداد سینیٹر کامران مرتضیٰ نے پیش کی۔ قرارداد کے متن میں کہا گیا ہے کہ  اکثر ممالک میں ویکسی نیشن فری لگائی جارہی ہے، پاکستان میں ویکسینیشن بہت مہنگی ہے اور  ویکسین منگوانے کیلئے پرائیوٹ کمپنی کو ٹھیکہ دیا  گیا ہے ۔  پاکستان میں ویکسینیشن 8 ہزار چارسو روپے ہے، جبکہ دیگر ممالک میں ویکسین کی قیمت پندرہ سو روپے ہے۔قرارداد کے مطابق  یہ آئین کے آرٹیکل 38 کی خلاف ورزی ہے، آرٹیکل 38 میں واضح ہے کہ ریاست اپنے شہریوں کو بنیادی حقوق فراہم کرے، عالمی منڈی1500جبکہ یہاں دو خوارکوں کی قیمت8400مقرر کی گئی۔ قرارداد میں کہا گیا کہ حکومت کو اپنے فیصلے پر نظرثانی کرنی چاہیئے۔چئیرمین سینیٹ نے کورونا سے متعلق قرارداد پر ووٹنگ کی ہدایت کردی۔ سینیٹ میں کوورنا ویکسین مفت یا اصل قیمت پر فراہمی سے متعلق قرارداد اکثریت رائے سے منظور کرلی گئی ۔

 حکومت کا کوورنا سے متعلق قرارداد کی تحریر پر اعتراض  کیا گیا ، وزیر مملکت برائے پارلیمانی امور علی محمد خان  نے کہاکہ قرادر میں الفاظ پر اعتراض ہے ، کوورنا ایک قومی مسئلہ ہے اس پر سیاست نہ کی جائے  ،حکومت رات دن اس بیماری کے خلاف اقدامات کررہی ہے  ۔ قائدایوان سینیٹر شہزادوسیم نے کہاکہ قرارداد پیش کرنے کا ایک طریقہ کارہوتا ہے، اس قرارداد میں تو حکومت کو چارج شیٹ کیا گیا ،سینیٹ میں قائد حزب اختلاف یوسف رضا گیلانی نے کہاکہ کورونا سے ملک کا وزیر اعظم بھی محفوظ نہیں ،غریب آدمی کورونا ویکسین کے اخراجات برداشت نہیں کرسکتا ۔ سینیٹر فیصل جاوید کاکہنا تھا کہ آج ایوان میں عجیب سی قرارداد منظور ہوئی،آج پوری دنیا انسداد کرونا پر عمران خان کی پالیسی کی معترف ہے، انشاء اللہ جلد تیسری لہر پر بھی قابو پالیں گے۔

 واضح رہے کہ حکومت    پاکستان نے 10 مارچ سے  60 سال سے زائد عمر کے افراد کیلئے کورونا ویکسینیشن  کا آغاز کیا گیا اور اس کے بعد 30 مارچ  سے  50 سال سے زائد عمر کے افراد کی ویکسی نیشن کا عمل جاری ہے  ۔ پاکستان میں جہاں حکومت کی جانب سے فرنٹ لائن ہیلتھ ورکرز یعنی طبی عملے اور 60 سال سے زائد عمر والے افراد کو کورونا سے بچاؤ کی مفت ویکسین لگانے کا سلسلہ جاری ہے وہیں نجی دوا ساز کمپنیوں کی جانب سے بھی فروخت کے لیے ویکسین درآمد کی جا رہی ہیں۔