پی ٹی آئی نے فیصل واڈا کی بنیادی رکنیت معطل کردی ، شوکاز نوٹس جاری

تفصیلات کے مطابق فیصل واوڈا کو پی ٹی آئی سندھ کے صدر علی زیدی نے شوکاز نوٹس جاری کردیا ۔ فیصل واڈا کو شوکاز نوٹس،  اسلام آباد میں سینئر صحافی ارشد شریف کے قتل اور لانگ مارچ کے حوالے سے پریس کانفرنس کے فوری بعد چیئرمین کی ہدایت پر جاری کیا گیا ہے ۔

سماجی رابطے کی ویب سائٹ ٹوئٹر پر پی ٹی آئی سندھ کے صدر علی حیدر زیدی نے کہا کہ فیصل واوڈا 2 دن میں وضاحت دیں کہ کیوں نہ ان کی بنیادی رکنیت منسوخ کی جائے؟

پی ٹی آئی رہنما نے کہا کہ فیصل واوڈا کی رکنیت معطل کردی گئی ہے، جب تک معطل ہیں میڈیا پر پی ٹی آئی کی نمائندگی نہیں کر سکتے۔

Show cause notice issued to Faisal Vawda! End of story. pic.twitter.com/iUlRyEt7kw

— Ali Haider Zaidi (@AliHZaidiPTI) October 26, 2022

اس سے قبل علی زیدی کے ٹوئٹ کا جواب دیتے ہوئے اسد عمر نے کہا کہ فیصل واڈا کا بیان پاکستان کی پالیسی اور نکتہ نظر کی عکاسی نہیں کرتا۔ 

اسد عمر نے کہا کہ چیئرمین عمران خان کی ہدایت پر سندھ کے صدر کو بتایا گیا ہے کہ فیصل واڈا کو پارٹی پالیسی کی خلاف ورزی پر شوکاز نوٹس جاری کریں۔

واضح رہے کہ گزشتہ روز پریس کانفرنس میں  فیصل واوڈا کا کہنا تھا کہ مجھے عمران خان کے لانگ مارچ میں خون ہی خون اور جنازے ہی جنازے نظر آرہے ہیں، اس ملک میں لاشوں اورخون کا کھیل بند ہونا چاہیے۔

خیال رہے سابق وزیراعظم عمران خان نے جمعے کو لاہور سے اپنی جماعت کا لانگ مارچ شروع کرنے کا اعلان کر رکھا ہے جس کا آخری پڑاؤ اسلام آباد میں ہوگا۔