پی ٹی آئی لانگ مارچ : پانچویں روز کا آغاز گوجرانوالہ سے ہوگا 

تفصیلات کے مطابق پاکستان تحریک انصاف کے لانگ مارچ کے پانچویں روز کا آغاز گوجرانوالہ میں پی ٹی آئی رہنما علی اشرف مغل کی رہائشگاہ سے کیا جائے گا۔

گوجرانوالہ کے مختلف مقامات پر عمران خان کا استقبال کیا جائے گا   ۔ شرکا چن دا قلعہ سے گوندلانوالہ چوک تک جائیں گے ۔ 

لانگ مارچ کے باعث گوجرانوالہ جی ٹی روڈ کے اطراف میں موجود  تمام تعلیمی ادارے آج بند رہیں گے۔

گزشتہ روز پی ٹی آئی کا لانگ مارچ  گوجرانوالہ کے علاقے چن دا قلعہ پہنچا تھا ۔ مارچ کے چوتھے روز کا آغاز کامونکی سے ہوا تھا اور اس دوران وہ ایمن آباد سے گوجرانوالہ کے علاقے چن دا قلعہ پہنچا تھا  ۔

چن دا قلعہ پہنچنے پر عمران خان نے مارچ کے شرکاء سے خطاب کیا اور کہا کہ اِدھر سے میں گوجرانوالہ شہر کے سفر کا آغاز کروں گا۔

انہوں نے کہا  کہ شہر سے جب ہم گزریں گے تو سارے پاکستان میں نظر آئے گا ملک میں انقلاب آرہا ہے، ساری قوم گواہ ہے پاکستان میں پُرامن انقلاب آ رہا ہے۔

پاکستان تحریک انصاف نے 28 اکتوبر کو لاہور کے لبرٹی چوک سے اپنے لانگ مارچ کا آغاز کیاتھا ۔