پی آئی اے کی استنبول کیلئے براہِ راست پروازوں کا آج سے آغاز

تفصیلات کے مطابق پاکستان اور ترکیہ میں مضبوط اور گہرے برادرانہ تعلقات ہیں ، پی آئی اے کی پروازوں کی شروعات دونوں اسلامی ممالک کے مابین دیرینہ تعلقات کی تجدیدِ نو ہے۔

پی آئی اے کی ترکیہ کے لیے پروازوں سے مسافروں کو یورپ، برطانیہ اور امریکا کے 28 شہروں تک سفر کی آسان رسائی ممکن ہو گئی۔ 

پی آئی اے استنبول سے ترکش ایئر لائن کی منسلک پروازوں سے امریکا ، برطانیہ اور یورپ کے مختلف شہروں تک سفری سہولتیں فراہم کرنے والی پہلی پاکستانی فضائی کمپنی ہے۔

پی آئی اے کی لاہور سے ہفتہ وار 2 اور اسلام آباد سے 4 پروازیں شروع کی جا رہی ہیں۔

لاہور ایئر پورٹ پر افتتاحی پرواز کے موقع پر ایک سادہ اور پروقار تقریب منعقد کی گئی جس کے مہمانِ خصوصی وزیرِ ایوی ایشن خواجہ سعد رفیق تھے ۔

تقریب سے خطاب کرتے ہوئے وزیرِ ایوی ایشن خواجہ سعد رفیق نے کہا کہ پاکستان اور ترکی گہرے تاریخی اور مشترکہ ثقافتی رشتے سے منسلک ہیں۔

انہوں نے یہ بھی کہا کہ پی آئی اے کا استنبول آپریشن پاکستان اور ترکیہ کے سفارتی تعلقات قائم ہونے کی 75 ویں سالگرہ کے طور پر کیا گیا ہے، پی آئی اے اپنی سروس کے معیار کو بہتر بنانے کے لیے کوشاں ہے۔