ٹوئٹر کا اپنے دفاتر آج سے عارضی طور پر بند کرنے کا اعلان

برطانوی میڈیا کےمطابق دنیا کی سب سے بڑی سوشل میڈیا سائٹ ٹوئٹرکمپنی کا دفاتر کو عارضی طور پر بند کرنے کا فیصلہ فوری نافذ العمل ہوگا تاہم دفاتر 21 نومبر سےدوبارہ کھل جائیں گے۔

ٹوئٹر نے کمپنی دفاتر عارضی طور پر بند کرنے کی وجوہات واضح نہیں کی ہیں  اور دفاتر  بند کرنے کی رپورٹ پرکسی بھی قسم کے   ردعمل دینے سے گریز کیا ہے۔

دوسری جانب ٹوئٹر پر مختلف ٹرینڈز بھی  جاری ہیں جس میں صارفین اس بلاگ سائٹ کے بند ہونے کا خدشہ ظاہر کر رہے ہیں۔

یاد رہے کہ ایک تخمینے کے مطابق ٹوئٹر کے سینکڑوں ملازمین نے کمپنی کو چھوڑنا شروع کر دیا ہے  کیونکہ ایلون مسک نے اُن کو ’مشکل حالات میں زیادہ دیر کام‘ کرنے کے حوالے سے تیار رہنے کے لیے کہا تھا۔

خیال رہے کہ ایلون مسک پہلے ہی ٹوئٹر کے 50 فیصد سے زیادہ عملے کو فارغ کرچکے ہیں۔

واضح رہے کہ ایلون مسک نے 28 اکتوبر کو 44 ارب ڈالر میں ٹوئٹر کی خریداری کے معاہدے کو مکمل کیا تھا۔ مائیکرو بلاگنگ ویب سائیٹ کی خریداری کا عمل دونوں طرف سے انتہائی پیچیدہ اور مشکلات سے بھرپور تھا ۔