تحریک انصاف کا مارچ روات پہنچ گیا

اسلام آباد انتظامیہ نے پی ٹی آئی کو ریلی نکالنے کی اجازت دے دی ہے، اور اسلام آباد انتظامیہ نے تحریک انصاف کے رہنما علی نواز اعوان کی درخواست پر این او سی جاری کردیا ہے۔

علی نواز اعوان نے ڈپٹی کمشنر سے ملاقات کی، اور ریلی کے لئے درخواست پیش کی، تاہم ریلی کی اجازت ڈسٹرکٹ مجسٹریٹ اسلام آباد نے دی۔

اسلام آباد سے تمام چھوٹی ریلیاں کورال چوک جمع ہوں گی، اسلام آباد ریجن کے شرکاء روات میں مارچ کا حصہ بنیں گے، ار عمران خان آج اپنے خطاب ميں آئندہ کے لائحہ عمل کا اعلان کریں گے۔

پی ٹی آئی کو ریلی نکالنے کے لیے 35 شرائط کی پابندی کرنا ہو گی، پی ٹی آئی کو ریلی کی اجازت صرف کورال چوک سے روات تک روٹ کے لئے دی گئی ہے۔

این او سی کے مطابق ریڈ زون اور باقی علاقوں میں دفعہ 144 کا نفاذ رہے گا، کوئی بھی سڑک کسی طرح سے بلاک کرنے کی اجازت نہیں ہوگی، سرکاری اور نجی املاک کو ہرگز نقصان نہیں پہنچایا جائے گا۔

این او سی میں کہا گیا ہے کہ ریلی کے لئے اسلام آباد کیپیٹل پولیس باقاعدہ ٹریفک پلان جاری کرے گی، ریاست، مذہب، نظریہ پاکستان کے مخالف نعروں اور تقریروں کی اجازت نہیں ہوگی۔

ریلی میں ہتھیار، اسلحہ اور ڈنڈے وغیرہ لانے پر کارروائی ہوگی اور شرائط کی خلاف ورزی پر قانونی کاروائی عمل میں لائی جائے گی۔

دوسری جانب تحریک انصاف کا مارچ اسلام آباد کے علاقے روات میں پہنچ گیا ہے، اور مارچ کے راستے میں پٹرول پمپس بند کرا دئیے گئے ہیں، پٹرول پمپ کے اندر پنجاب پولیس کی نفری موجود ہے۔

پٹرول پمپ کے ساتھ تعلیمی ادارے بھی بند کرا دیئے گئے ہیں، اور جی ٹی روڈ کو چک بیلی موڑ کے پاس ڈاؤرژن لگا کر بند کردیا گیا ہے، جب کہ جی ٹی روڈ کو ایک جانب سے ٹریفک کے لیے کھلا رکھا گیا ہے۔

جی ٹی روڈ پر عمران خان اور دیگر پارٹی رہنماوں کے خطاب کے لئے اسٹیج بھی تیار کر لیا گیا ہے۔

گزشتہ روز عمران خان نے کہا تھا کہ وہ آج راولپنڈی جانے کے حوالے تاریخ کا بھی اعلان کریں گے۔