آمدن سے زائد اثاثہ جات کیس : اسحاق ڈار کے خلاف ریفرنس نیب کو واپس بھجوا دیا گیا

تفصیلات کے مطابق  احتساب عدالت میں آمدن سے زائد اثاثہ جات ریفرنس کیس کی سماعت   ہوئی ، معززجج محمد بشیر نے  ریمارکس دئیے کہ  ترمیمی ایکٹ کے بعد اس کیس پر اس عدالت کا دائرہ اختیار نہیں، اسحاق ڈار کے خلاف جاری ٹرائل یہیں ختم کیا جاتا ہے۔ 

احتساب عدالت کا کہنا ہے کہ ترمیمی ایکٹ کے بعد بریت کی درخواستوں پر فیصلہ ہمارا اختیار نہیں، نہ ہم نیب ، نہ ہی ملزمان کے حق میں فیصلہ دے سکتے ہیں۔

احتساب عدالت کے جج محمد بشیر نے منگل کو  وزیر خزانہ اسحاق ڈار سمیت دیگر تین ملزمان کی بریت کی درخواست پر محفوظ شدہ فیصلہ سنایا۔ 

ریفرنس میں وزیر خزانہ اسحاق ڈار ،سابق صدر نیشنل بینک سعید احمد، نعیم محمود اور منصور رضا رضوی نامزد تھے۔ ریفرنس میں 42  گواہوں کے بیانات قلمبند کیے گئے تھے ، عدالت نے فریقین کے دلائل مکمل ہونے پر فیصلہ محفوظ کیا تھا۔

 نیب کی جانب سے اسحاق ڈار سمیت دیگر ملزمان کے خلاف دسمبر 2017 میں ریفرنس دائر کیا گیا تھا۔