قومی ایئر لائن نے لاہور سے شمالی علاقہ جات کیلئے براہ راست پروازوں کا آغاز کردیا

تفصیلات کے مطابق پی آئی اے نے تاریخ میں پہلی مرتبہ لاہور سے شمالی علاقہ جات کیلئے براہ راست پروازوں کا آغاز کردیا ، افتتاحی پرواز 153 مسافر کو لے کر لاہور سے اسکردو روانہ ہوئی، مسافروں کی جانب سے پی آئی اے کی نئی پرواز کا خیر مقدم کیا گیا۔ لاہور سے شمالی علاقہ جات کیلئے ہفتہ وار 2پروازیں چلائی جائیں گی۔  اس موقع پر سی ای اوپی آئی اے ارشد ملک نے کہا کہ پی آئی اے سیاحت کے فروغ کے لئے قومی کردار ادا کر رہی ہے ، مسافروں کی سہولت کیلئے فضائی رابطے سے منسلک کررہےہیں۔

کچھ عرصے سے شمالی علاقہ جات کے ہوائی اڈوں کو فعال کر کے فلائٹ آپریشن بحال کیا جارہا ہے  تاکہ ان علاقوں میں سیاحت کو مزید بڑھایا جا سکے۔

 گزشتہ ماہ کے آخر میں قومی ائر لائن نے  سیدو شریف ائیرپورٹ پر 17سال بعد فلائٹ آپریشن بحال کیا گیا تھا ، اسکردو، گلگت اور چترال کے بعد یہ چوتھا سیاحتی مقام ہے جس کیلئے  پی آئی اے  نے  فضائی آپریشن کا آغاز کیا ہے ۔