این اے 75 ضمنی الیکشن کیلئے سیکیورٹی پلان تشکیل

تفصیلات کے مطابق  الیکشن کے دن حساس پولنگ اسٹیشنز کی سی سی ٹی وی کیمروں کے ذریعے نگرانی کی جائے گی، حلقہ این اے 75 میں ضمنی انتحابات کے لئے سیکیورٹی پلان تشکیل دے دیا گیا۔4200 پولیس اہلکار اور آفیسران سیکیورٹی کے لئے تعینات کئے جائیں گے۔

جی این این کے مطابق  رینجر کے 1048 اہلکار جب کے پاک فوج کی دس ٹیمیں کوئیک رسپانس فورس کے طور پر موجود ہوں گی،  سیالکوٹ 47 پولنگ اسٹیشنز انتہائی حساس قرار دے دئیے گئے ہیں ۔ سیالکوٹ حساس پولنگ اسٹیشنز کے باہر پولیس کی اضافی نفری بھی تعینات کی جائے گی۔

ڈی پی او عبدالغفار قیصرانی کا کہنا ہے کہ  الیکشن کے دن غیر قانونی حرکات کرنے والوں سے سختی کے ساتھ نمٹا جائے گا۔

دوسری جانب  ڈسکہ این اے 75  انتخابات کا معاملہ،  ڈسٹرکٹ مونیٹرنگ آفیسر نے ڈسٹرکٹ پولیس آفیسر کو خط لکھ دیا،  مسلم لیگ ن یوتھ ونگ کی جانب سے آج چار بجے موٹرسائیکل ریلی کا انعقاد کیا جا رہا ہے۔ریلی کے لیے لوکل ایڈمنسٹریشن سے اجازت نہیں لی گئی،  ایسی سرگرمیاں بغیر اجازت ضابطہ اخلاق کی خلاف ورزی ہیں ،  ڈسٹرکٹ پولیس آفیسر اس معاملے کا نوٹس لیں۔

چند دن قبل  سپریم کورٹ نے این اے 75 ڈسکہ میں دوبارہ انتخابات سے متعلق کیس کا مختصر فیصلہ سناتے ہوئے پی ٹی آئی کی اپیل مسترد کردی تھی اور  الیکشن کمیشن کا فیصلہ برقرار رکھا تھا۔ سپریم کورٹ نے الیکشن کمیشن کا فیصلہ برقرار رکھتے ہوئے 10اپریل کو پورے حلقے میں دوبارہ پولنگ کا حکم دے دیا تھا۔

خیال رہے کہ الیکشن کمیشن نے این اے 75 ڈسکہ میں 10 اپریل کو ضمنی الیکشن کرانے کا شیڈول جاری کیا تھا۔الیکشن کمیشن نے اس سے قبل ضمنی انتخاب کیلئے 18 مارچ  کی تاریخ دی گئی تھی۔

واضح رہے الیکشن کمیشن نے این اے 75 کے ضمنی  انتخاب کو کالعدم قرار دیتے ہوئے پورے حلقے میں دوبارہ الیکشن  کرانے کا حکم دیا تھا۔   الیکشن کمیشن فیصلے میں کہا گیا تھا کہ حلقے میں ضمنی انتخاب شفاف نہیں ہوا، انتخابی ماحول خراب کیاگیا اور لڑائی جھگڑے کے واقعات ہوئے، ووٹرزکوووٹ ڈالنے کیلئےبہترماحول نہیں ملا اور تمام پولنگ اسٹیشن پردوبارہ پولنگ ہوگی ۔