عمران خان لازمی بلٹ پروف جیکٹ پہنیں،گاڑی سے باہر نہ نکلیں : پولیس کا پی ٹی آئی کو مراسلہ

پولیس حکام کے مراسلے میں پی ٹی آئی سے کہا گیا ہے کہ وی آئی پی کی سیکورٹی کے لئے ہدایات پر عملدرآمد کو یقینی بنایا جائے۔

مراسلے میں کہا گیا ہےکہ   بُلٹ پروف روسٹرم کو یقینی بنایا جائے اور عمران خان بُلٹ پروف جیکٹ بھی لازماً استعمال کریں۔

پولیس حکام کا کہنا ہے کہ عمران خان کسی عوامی مقام پر گاڑی سے باہر نہ نکلیں اور روایت کے برعکس عمران خان کی نقل و حرکت کو خفیہ رکھا جائے۔

مراسلے کے مطابق  وی آئی پی سیکورٹی افسر اور قانون نافذ کرنے والے اداروں سے رابطہ میں رہ کر نقل و حرکت کریں۔ وی آئی پی کی گاڑی کی پارکنگ الگ اور مخصوص ہو گی ،  سٹیج پر شرکاء کی فہرست پہلے سے انتظامیہ کو فراہم کی جائے،  اسٹیج پر نقل و حرکت محدود رکھی جائے۔   

مراسلے  میں کہا گیا ہے کہ عمران خان کسی مقام پر عوام سے ملاقات نہیں کریں گے جبکہ تمام شرکاء مجوزہ مقام سے مکمل چیکنگ کے بعد ہی داخل ہو سکیں گے۔

پی ٹی آئی کے جلسے کے موقع پر آٹھ ہزار سے زائد پولیس اہلکار سیکیورٹی پر تعینات کیے گئے ہیں، جلسے سے عمران خان سمیت اہم رہنما خطاب کریں گے۔

واضح رہے کہ پاکستان تحریک انصاف نے راولپنڈی جلسے کے لیے مرکزی اسٹیج سکستھ روڈ فلائی اوور پر لگا دیا ہے۔