مقبوضہ کشمیر میں بھارتی ریاستی دہشتگردی جاری، مزید4 نوجوان شہید

تفصیلات کے مطابق مقبوضہ کشمیر میں بھارتی ریاستی دہشتگردی کے نتیجے میں بھارتی فوجیوں نے مزید 4 نوجوان شہید کردیئے ہیں۔کشمیر میڈیا سروس کے مطابق پلوامہ  میں  سرچ آپریشن کے دوران دو نوجوان شہیدہوئے  جبکہ شوپیاں کے علاقے جان محلہ میں دو اور نوجوانوں کوشہیدکردیاگیا۔اس سے قبل جمعرات کی رات فوجیوں نے جان محلہ کے علاقے میں تین نوجوانوں کو شہید کیاتھا۔جس کے بعد  کل سے آج تک  شہید نوجوانوں کی تعداد 7  ہوگئی ہے ۔ 

واضح رہے کہ بھارت نے مقبوضہ کشمیر میں   ظلم وبربریت کا بازار گرم کر رکھا ہے ،  کئی دہائیوں سے بھارت  مقبوضہ کشمیر میں جاری آزادی کی تحریک کو دبانے   کی کوشش کر رہا ہے اور گزشتہ سال 200 سے زائد  افراد کو شہید کیا گیا ہے۔جبکہ ہزاروں کشمیریوں سمیت مقبوضہ وادی کی سیاسی قیادت کو بھی جیلوں میں بند کر رکھا ہے۔

 5اگست 2019 کو مودی سرکار نے کشمیر کو خصوصی حیثیت دینے والے بھارتی آئین کے آرٹیکل 370 اے کو ختم کر کے مقبوضہ وادی میں کرفیو نافذ کر دیا تھا اور بھارت نے کشمیریوں کی نقل وحرکت پر پابندی عائد کر رکھی ہے۔

یکم نومبر سے بھارتی آئین کے آرٹیکل 35 اے   کے خاتمے سے بھارتی شہریوں کو مقبوضہ کشمیر میں جائیداد خریدنے اور وہاں رہنے کا حق بھی حاصل ہو گیا ہے۔ بھارتی آئین کے آرٹیکل 35 اے کے تحت مقبوضہ کشمیر کو بھارت میں خصوصی درجہ حاصل ہے جس کے تحت صرف کشمیری ہی وادی میں جائیداد خریدنے اور ورثے میں منتقل کرنے کا حق رکھتے ہیں۔