نون لیگ نے نگران وزیراعلیٰ کے لیے محسن نقوی اور احد چیمہ کے نام گورنر کو بھجوا دیے

 پنجاب میں حزب اختلاف کی نمائندہ جماعت پاکستان مسلم لیگ ن نے نگران وزیراعلیٰ کیلئے 2 نام گورنر پنجاب کو بھیجوا دیئے۔ تفصیلات کے مطابق  مسلم لیگ ن نے نگران وزیر اعلیٰ کیلئے 2 نام گورنر پنجاب کو بھیجے ہیں،

پنجاب میں اپوزیشن کی جانب سے محسن رضا نقوی اور احد خان چیمہ کے نام تجویز کیے گئے ہیں، اس حوالے سے اپوزیشن لیڈر پنجاب اسمبلی حمزہ شہباز کی جانب سے گورنر پنجاب کو خط لکھا گیا ہے،

جس میں حمزہ شہباز نے ملک احمد کو نگران وزیر اعلیٰ کے معاملے پر اپنا نمائندہ مقررکردیا جو وزیراعظم شہباز شریف کے معاون خصوصی بھی ہیں۔ 

گزشتہ روز وزیراعلٰی پنجاب چوہدری پرویز الٰہی نے گورنر کو خط میں نگراں وزیراعلٰی کیلئے تین نام بھجوائے تھے، وزیراعلٰی پنجاب چوہدری پرویز الٰہی نے نگراں حکومت کیلئے گورنر پنجاب بلیغ الرحمان کو خط لکھا،

چوہدری پرویز الٰہی نے خط میں گورنر پنجاب کو تین نام بھجوائے،خط میں احمد نواز سکھیرا،ناصر کھوسہ اور محمد نصیر خان کے نام شامل تھے۔ 

گورنر پنجاب نے تصدیق کی کہ وزیراعلٰی چوہدری پرویز الٰہی کی جانب سے نگراں وزیراعلٰی کے لیے بھجوائے گئے نام موصول ہوگئے،

اس حوالے سے گورنر پنجاب نے کہا کہ نگراں وزیراعلٰی کے نام مل گئے ہیں،وزیراعلٰی چوہدری پرویز الٰہی کے تجویز کردہ نام اپوزیشن لیڈر حمزہ شہباز کو بھجوا رہے ہیں۔

بتاتے چلیں کہ چوہدری پرویز الہیٰ نے نگران وزیراعلیٰ کے لیے جو تین نام دئیے ان میں سے ناصر کھوسہ پہلے ہی معذرت کر چکے ہیں،

احمد نواز سکھیرا سرکاری ملازم ہیں جو 31جنوری کو ریٹائرڈ ہو رہے ہیں جب کہ محمد نصیر خان دہری شہریت کے حامل نکلے ہیں، تحریک انصاف نے محمد نصیر خان کی دہری شہریت کی تصدیق کر دی ہے، تاہم تحریک انصاف کا موقف ہے کہ نگران وزیراعلیٰ پر آرٹیکل 62,63 کا اطلاق نہیں ہوتا۔ 

گذشتہ روز وزیر دفاع خواجہ آصف نے کہا تھا کہ ناصر کھوسہ صاحب کی قابلیت اصول پسندی اور دیانت داری مسلمہ ہے، بحیثیت بیوروکریٹ انکا کردار قابل فخر ہے،

ہم نے ان سے رابطہ کیا کی فریقین کی طرف سے متفقہ کیئرٹیکر وزیر اعلیٰ کاعہدہ قبول کریں تاہم انہوں نے اس تجویز سے اتفاق نہیں کیا اور معذرت کرلی۔