وزیرخزانہ محمد اورنگزیب نے کاروباری ماحول کو بین الاقوامی سرمایہ کاروں کیلئے مزید سازگار بنانے کے حکومتی عزم کا اظہارکیا ہے ۔

یو کے پاکستان گرین انویسمنٹ فورم کے ایک آن لائن اجلاس سے خطاب کرتے ہوئے انہوں نے اس بات پر زوردیا کہ پاکستان ماحولیاتی تبدیلی سے نمٹنے اور گرین انویسمنٹ کے مواقع کوفروغ دینے کیلئے پرعزم ہے۔

فورم کا اہتمام پاکستان میں برطانوی ہائی کمیشن نے کیاتھا ۔

وزیر خزانہ نے اس بات کو اجاگر کیا کہ عالمی سطح پر زہریلی گیسوں کے اخراج میں پاکستان کا کردار کم ہے اس کے باوجود وہ موسمیاتی تبدیلی کے مضر اثرات کے خطرات سے دوچار ہے۔

موافقت، لچک اور تخفیف کے منصوبوں میں فنڈنگ کے نمایاں فرق کو تسلیم کرتے ہوئے محمد اورنگزیب نے اس تقسیم کے خاتمے کی اہمیت پر زور دیا۔

انہوں نے کہا کہ پاکستان میں بدلتے ہوئے موسم زرعی پیداوار کو متاثر کر رہے ہیں اور سیلابوں، طوفانوں اور گرمی میں اضافے جیسے خطرات پیدا کر رہے ہیں۔

فورم کا اہتمام کرنے پر برطانوی ہائی کمیشن کا شکریہ ادا کرتے ہوئے وزیر خزانہ نے سرسبز سرمایہ کاری کے منصوبوں کیلئے بہتر ڈیزائن کی ضرورت کو تسلیم کیا۔

وزیر خزانہ نے ماحولیات کے لئے بین الاقوامی رقوم جمع کرنے کے جدید طریقے استعمال کرنے کے منصوبوں کا خاکہ بھی پیش کیا۔

انہوں نے کہا کہ حکومت پائیدار ترقی کے منصوبوں کی مالی معاونت کیلئے رواں سال دسمبر تک ملکی گرین سکوک بانڈز جاری کرنے کے حوالے سے کام کر رہی ہے۔

احتساب عدالت اسلام آباد میں پارک لین اور توشہ خانہ گاڑیوں کے ریفرنس میں صدر مملکت آصف علی زرداری کو صدارتی استثنیٰ مل گیا۔

 عدالت نے صدر مملکت آصف علی زرداری کے خلاف کارروائی روک دی۔احتساب عدالت کے جج ناصر جاوید رانا نے صدر مملکت آصف زرداری کی نیب کیسز میں صدارتی استثنیٰ کی درخواستوں کا تحریری فیصلہ جاری کیا۔

تحریری فیصلے میں کہا گیا ہے کہ جب تک آصف علی زرداری صدر مملکت ہیں، ان کے خلاف کیسز کی کارروائی آگے نہیں بڑھ سکتی۔آصف علی زرداری کی جانب سے آئین کے آرٹیکل 248 (2) کے تحت درخواست دائر کی گئی، درخواستوں میں مؤقف اختیار کیا گیا کہ آصف زرداری جب تک صدر مملکت ہیں کیسز کی کرمنل کارروائی جاری نہیں رہ سکتی۔

فیصلے میں کہا گیا کہ پراسیکیوشن کی جانب سے ان درخواستوں پر کوئی بھی اعتراض نہیں کیا گیا اور نہ ہی مخالفت کی گئی، آئین کے آرٹیکل 248 (2) کے تحت صدر مملکت آصف علی زرداری کے خلاف کوئی کیس نہیں ہوسکتا اور نہ  کوئی کارروائی جاری رہ سکتی ہے۔

بعد ازاں احتساب عدالت نے صدر مملکت آصف علی زرداری کی کیسز سے صدارتی استثنیٰ حاصل کرنے کی درخواستیں منظورلیں۔

صوبائی ڈیزاسٹر مینجمنٹ اتھارٹی (پی ڈی ایم اے) نے آج رات سے پنجاب کے مختلف اضلاع میں آندھی اور گرج چمک کے ساتھ بارش کی پیش گوئی کی ہے۔

ترجمان پی ڈی ایم اے کے مطابق پنجاب کے بیشتر اضلاع میں آج موسم گرم اور خشک رہے گا تاہم بیشتر اضلاع میں شام اور رات کے اوقات میں بارش کا امکان ہے۔مری، گلیات، راولپنڈی، اٹک، جہلم، چکوال، بھکر، میانوالی، خوشاب اور نور پور تھل میں آندھی کے ساتھ بارش ہوگی۔

پی ڈی ایم اے کی جانب سے جاری کی گئی پیش گوئی میں کہا گیا ہے کہ لاہور، سرگودھا، منڈی بہاؤالدین، گجرات، گوجرانوالہ، سیالکوٹ، نارووال، قصور، اوکاڑہ اور ٹوبہ ٹیک سنگھ میں بھی بارش کا امکان ہے۔

دوسری جانب ملک کے بعض علاقوں میں بارش سے موسم خوشگوار ہوگیا ہے۔ جبکہ بعض مقامات پر شدید گرمی نے لوگوں کا برا حال کردیا ہے۔

بلوچستان کے مختلف شہروں چمن، کوزک ٹاپ، شیلا باغ اور ٹوبہ اچکزئی میں وقفے وقفے سے بارش کا سلسلہ جاری ہےجبکہ پیر علی زئی جنگل، قلعہ عبداللہ، پشین میں طوفانی ہواؤں کے باعث کوئٹہ چمن شاہراہ پر ٹریفک متاثر ہوئی ہے اور میرپور، دھیرکوٹ، سماہنی آزاد کشمیر، مانسہرہ میں بھی بارش ہورہی ہے تاہم سندھ اور پنجاب میں گرمی کی شدت میں اضافہ جاری ہے۔