ملکی تقاضوں اور حکومتی مفادات میں فرق ہے: شاہ محمود قریشی

اسلام آباد: سابق وزیر خارجہ شاہ محمود قریشی نے کہا ہے کہ مجھ پر 6 ایف آئی آرز کاٹی گئیں، یہ ساری ایف آئی آرز سیاسی کارروائیاں ہیں۔

رہنما پاکستان تحریک انصاف نے کہا کہ  ہم نے ہمیشہ مثبت رویہ اپنایا ہے، ہمارے خلاف انتقامی کارروائیاں ہو رہی ہیں، اس وقت ملک کے تقاضے اور ہیں، حکومت کے مفادات اور ہیں۔

مجھ پر لوگوں کو مشتعل کرنے، ان کو اکسانے کی کوشش کرنے کا الزام لگاتے ہیں، جنہوں نے یہ الزام لگایا وہ میری کوئی تقریر پیش کر دیں۔

اپنے ایک بیان میں سابق وزیر خارجہ نے کہا کہ پی ٹی آئی کی اولین ترجیح پاکستان کے مفادات ہیں، ہم نے 2022 میں دہشتگردی سے نمٹنے کیلئے پالیسی دی، ہمارے دور میں دہشتگردی میں کمی آئی، ہم نے آرمی پبلک سکول پر حملے پر اپنا دھرنا ختم کیا، سانحہ اے پی ایس پر ہم نے اے پی سی میں شرکت کی۔

 آئینی، قانونی اور سیاسی جنگ جاری ہے، اے پی سی کے معاملے پر حکومت کی سنجیدگی پر تعجب ہے۔

شاہ محمود نے کہا کہ  ہم قانون کا احترام کرنے والے ہیں، پی ٹی آئی آئین کی حکمرانی کی آواز بلند کر رہی ہے، گزشتہ 8 ماہ سے کیسز لٹک رہے ہیں۔