کوئٹہ : بلوچستان میں سیلاب اور بارشوں کے باعث ریلوے ٹریک کو شدید نقصان پہنچنے کے بعد کوئٹہ سے اندرون ملک جانے والی تمام ٹرین سروسز 14 روز سے معطل ہیں۔ دوزان پل سمیت متعدد مقامات پر ریلوے ٹریک کی مرمت میں تاخیر کے باعث مسافر شدید مشکلات کا شکار ہیں۔

ریلوے حکام کے مطابق سبی سے ہرنائی کے درمیان ریلوے ٹریک 23 جولائی سے بند ہے اور اب تک اس کی مرمت مکمل نہیں ہوسکی۔ اسی طرح کوئٹہ تفتان ریلوے سیکشن بھی 15 روز سے بند ہے اور چاغی میں بہہ جانے والی ریلوے لائن کی مرمت بھی نہیں ہوسکی۔ کوئٹہ چمن ٹرین سروس بھی 10 روز سے معطل ہے اور شیلا باغ سرنگ کی مرمت میں مزید 15 روز لگ سکتے ہیں۔

ان تمام صورتحال کے باعث صوبے میں ٹرین سروسز کی بندش سے ریلوے کو روزانہ تقریباً 15 لاکھ روپے کا نقصان ہو رہا ہے۔ اس کے علاوہ لاکھوں مسافر ٹرین سروسز کے معطل ہونے سے شدید مشکلات کا شکار ہیں۔

بہت سے مسافر وں کی روزمرہ زندگی متاثر ہو رہی ہے۔ مسافروں کو مہنگے نجی ٹرانسپورٹ کا سہارا لینا پڑ رہا ہے جو ان کے لیے مزید مالی بوجھ ہے۔

وفاقی وزیر داخلہ محسن نقوی سے نائب امیر جماعت اسلامی پاکستان لیاقت بلوچ کا ٹیلی فونک رابطہ ہوا، جس میں دونوں فریقین کے درمیان ہونے والے معاہدے پر پیشرفت سے متعلق گفتگو ہوئی۔

نائب امیر جماعت لیاقت بلوچ نے بتایا کہ مذاکرات معاہدے پر عملدرآمد بارے آگاہی دینے کے لیے وزیر داخلہ محسن نقوی اور وزیر اطلاعات عطا تارڑ پر مشتمل 2 رکنی حکومتی وفد منصورہ آئیں گے اور طے پانے والے معاہدے پر عمل درآمد کی پیشرفت سے آگاہ کریں گے۔ جماعت اسلامی حکومت کے ساتھ معاہدے پر مکمل عمل درآمد چاہتی ہے.

نائب امیر جماعت نے مزید کہا کہ آئی پی پیز معاہدوں پر نظر ثانی، بجلی بلوں پر کیپیسٹی چارجز کا خاتمہ اور بجلی کے ٹیرف میں کمی ہمارے مطالبات ہیں جبکہ سرکاری ملازمین پر ٹیکسز میں کمی چاہتے ہیں۔  وفاقی حکومت انٹرنیشنل اسلامک یونیورسٹی کے طلبہ کے مسائل حل کرے، جس پر وزیر داخلہ محسن نقوی نے انٹرنیشنل اسلامک یونیورسٹی کے طلبہ کے مسائل حل کرنے کی یقین دہانی کرائی ہے۔

وزیر داخلہ محسن نقوی نے انٹرنیشنل اسلامک یونیورسٹی کے طلبہ کے مسائل حل کرنے کی یقین دہانی کرائی ہے۔

لاہور : وفاقی تحقیقاتی ایجنسی (ایف آئی اے) نے لاہور میں ایک بڑی کارروائی کرتے ہوئے انسانی سمگلنگ کے ایک بین الاقوامی نیٹ ورک پکڑ لیا ہے۔ یہ نیٹ ورک سادہ لوح لوگوں کو بیرون ملک روزگار کا جھانسہ دے کر لوٹتا تھا اور جعلی دستاویزات بنا کر غیر قانونی طور پر لوگوں کو دوسرے ممالک میں منتقل کرتا تھا۔

ایف آئی اے کے مطابق اس نیٹ ورک نے کروڑوں روپے کی رقم لوٹ لی تھی اور اس کے پاس مختلف ممالک کی جعلی دستاویزات بنانے کا ایک مکمل پرنٹنگ پریس بھی تھا۔ تفتیش سے یہ بھی معلوم ہوا ہے کہ اس نیٹ ورک کے بین الاقوامی ڈنکی گروہوں سے بھی روابط تھے اور اس میں بھارتی اور افغانی باشندے بھی ملوث تھے۔

دورانِ تفتیش پاکستان کو بدنام کرنے کی ایک بھارتی سازش بھی بےنقاب ہوئی ہے۔ ایف آئی اے کے حکام کا کہنا ہے کہ اس نیٹ ورک کے خلاف مزید گرفتاریاں متوقع ہیں۔

وفاقی وزیر داخلہ محسن نقوی نے اس کامیابی پر ایف آئی اے اور انٹیلی جنس ایجنسیوں کو مبارکباد دیتے ہوئے کہا ہے کہ یہ انسانی سمگلنگ کے خلاف پاکستان کی جنگ میں ایک اہم سنگ میل ہے۔ انہوں نے کہا کہ انسانی سمگلنگ کے خاتمے کے لیے حکومت آہنی ہاتھوں سے کام لے گی،انسانی سمگلنگ روکنے کے اس طرز پر مزید آپریشن جاری رکھے جائیں گے۔