پاک امریکا دفاعی مذاکرات کا دوسرا دور 13 فروری سے شروع ہوگا

 پاکستان اور امریکہ کے دفاعی مذاکرات کا دوسرا دور کل سے واشنگٹن میں شروع ہوگا۔ پاکستانی وفد کی قیادت چیف آف جنرل سٹاف کریں گے۔ دفاعی مذاکرات کے دوران دوطرفہ دفاعی اور سکیورٹی تعاون کے امور پر تبادلہ خیال کیا جائے گا۔

پاکستان اور امریکہ کے دفاعی مذاکرات کا دوسرا دور 13 سے 16 فروری تک واشنگٹن میں شیڈول ہے۔ ترجمان دفتر خارجہ کا کہنا ہے کہ پاکستانی وفد کی قیادت چیف آف جنرل سٹاف کریں گے۔ اس کے علاوہ پاکستانی وفد میں وزارت خارجہ، جوائنٹ سٹاف ہیڈ کوارٹرز اور تین سروسز ہیڈ کوارٹرز کے اعلیٰ حکام شامل ہوں گے۔

ترجمان دفتر خارجہ کا کہنا ہے کہ امریکی ملٹی ایجنسی ٹیم کی نمائندگی انڈر سیکرٹری آف ڈیفنس آفس کریں گے۔ دفاعی مذاکرات کے دوران دوطرفہ دفاعی اور سکیورٹی تعاون کے امور پر تبادلہ خیال کیا جائے گا۔

یاد رہے کہ پاکستان اور امریکہ کے دفاعی مذاکرات کا پہلا دور جنوری 2021 میں پاکستان میں ہوا تھا۔