ترکیہ زلزلہ، حکومت پر اعتبار نہیں اسلیے ایک ماہ کی تنخواہ نہیں دوں گا، اکبر چترالی

پارلیمنٹ کے مشترکہ اجلاس میں ارکان نے ایک ماہ کی تنخواہ ترکیہ اور شام کے زلزلہ متاثرین کو دینےکا اعلان کردیا تاہم متحدہ مجلس عمل کے رکن قومی اسمبلی مولانا عبد الکبر چترالی نے انکار کیا۔

پارلیمنٹ کا مشترکہ اجلاس اسپیکر قومی اسمبلی راجہ پرویز اشرف کی زیر صدارت ہوا جس میں ارکان نے ایک ماہ کی تنخواہ زلزلہ متاثرین کو دینے کا اعلان کیا۔ 

اسپیکر راجہ پرویز اشرف نے ایک ماہ کی تنخواہ زلزلہ متاثرین کودینےکی رولنگ دی جس پر مولانا عبدالاکبر چترالی نے اسپیکر کو تنخواہ دینے سے انکار کیا۔

انہوں نے کہا کہ مجھے اعتماد نہیں، اپنی تنخواہ اپنی جماعت کی فلاحی تنظیم کو دوں گا۔

اس پر اسپیکر نے دوبارہ رولنگ دی کہ مولانا عبدالاکبرچترالی کے سوا تمام ارکان نے اپنی تنخواہ رضاکارانہ طور پر دینے کا اعلان کیا ہے لہٰذا ان کے سوا سب کی ایک ماہ کی تنخواہ ترکیہ و شام کے فنڈز میں دی جائے گی۔