وزیراعظم کا ملک کوترقی کی راہ پرگامزن کرنے کیلئے ذاتی مفادات بالائے طاق رکھنے پرزور

اسلام آباد: وزیراعظم شہباز شریف نے قومی لائحہ عمل کے حوالے سے جائزہ اجلاس سے خطاب کرتے ہوئے کہا کہ پاکستان کی معاشی ترقی کے لئے سیاسی استحکام ناگزیر ہے۔

انہوں نے افسوس ظاہر کیاکہ ایک مخصوص سیاسی گروہ ملک میں عدم استحکام پیدا کرنے کے لئے سڑکوں کارخ کررہاہے جبکہ دوسری طرف اتحادی جماعتوں نے وطن کی خاطر اپنا سیاسی سرمایہ دائو پر لگادیاہے۔

شہباز شریف نے کہا یہ ہماری اولین ذمہ داری ہے کہ ہم پاکستان کے عوام کی خوشحالی اورترقی کے لئے درست راہ کے تعین میں اپنا کردار ادا کریں اور ہم اس ذمہ داری کوقبول کرتے ہیں۔

انہوں نے یقین ظاہر کیا کہ پاکستان موجودہ معاشی بحران سے جلدنکل آئے گا۔وزیراعظم نے امید ظاہر کی کہ عالمی مالیاتی فنڈ کے ساتھ جلد معاہدہ ہو جائے گا۔

دہشت گردی کے خلاف جنگ میں پاکستان کی قربانیوں کا اعتراف کرتے ہوئے انہوں نے کہا کہ اس برائی کے خاتمے میں تراسی ہزار افراد نے اپنی جانیں قربان کی ہیں۔ انہوں نے کہا کہ سیکیورٹی فورسزملک میں امن واستحکام کے قیام کے لئے پُرعزم ہیں۔