علمائےکرام نے پرتشدد مظاہروں ،توڑپھوڑ اورشاہراہیں بند کرنے کی مخالفت کردی

تفصیلات کے مطابق  مختلف مکاتب فکر کے جید علمائے کرام نے پرتشدد احتجاج ،توڑپھوڑ اورشاہرائیں بند کرنے کی مخالفت کردی ۔ کوئی ایساعمل کرناجائز نہیں جس سے لوگوں کی جان ومال کونقصان پہنچے ۔

ڈاکٹر راغب حسین نعیمی نے اپنے بیان میں کہاکہ کوئی بھی ایسا عمل جولوگوں کے لیے مشکلات کاباعث بنے،اس سے احترازکرناچاہیے۔لوگوں کے جان ومال کی حفاظت انتہائی ضروری ہے۔پرامن احتجاج ضرور ریکارڈ کرائیں اس کے بعد مجمع کو منتشر کردیں ، نہ کہ مستقل طورپرشاہراؤں پرڈیرے ڈال کربیٹھ جائیں ۔

علامہ ضیاء اللہ شاہ بخاری نے کہاکہ ہمارے کسی عمل سے اپنے ہی بھائیوں کوکوئی تکلیف نہیں پہنچنی چاہیے۔راستے بند کرکے ان کے لیے مشکلات نہیں پیداکرنی چاہیے ۔حضورنبی کریم ﷺ  نے ہمیں جواخلاق دیا ہے ،اسے اپناناہمارے لیے ذریعہ نجات ہوگا ۔

معروف عالم دین صاحب زادہ حامد رضا نے کہاکہ جوعالمی حالات ہیں اورپاکستان کے خلاف سازش کی جارہی ہے۔کوئی ایساراستہ اختیارنہ کریں جس سے ہمارا جوعظیم مقصد ہے اسے نقصان پہنچے۔یہ تاثرنہیں جاناچاہیے کہ یہ شاید متشدد لوگ ہیں۔۔پاکستان کودشمن ممالک اسرائیل اوربھارت کی طرف سے شدیدخطرات ہیں۔

علمائے کرام نے اپیل کی ہے کہ جولوگ شاہراؤں پرموجود ہیں پرامن طورپرمنتشر ہوجائیں اوراپنے ہی بھائیوں کے لیے پریشانی اورمشکلات کاباعث نہ بنیں۔