وزیر اعظم کا پیٹرولیم مصنوعات کی قیمتوں میں کمی کا اعلان

تفصیلات کے مطابق  وزیر اعظم عمران خان نے پیٹرولیم مصنوعات کی قیمتوں میں کمی کی منظوری دے دی ہے،  پیٹرول فی لیٹر ایک روپے 79 پیسے سستا ہوگیا،  ہائی اسپیڈ ڈیزل 2 روپے 32 پیسے فی لیٹر سستا جبکہ  مٹی کا تیل 2 روپے 6 پیسے فی لیٹر سستا کردیا گیا۔

جی این این کے مطابق  لائٹ ڈیزل کی قیمت میں 2 روپے 21 پیسے فی لیٹر کمی کی گئی ہے۔پیٹرول کی قیمت کم ہو کر 108 روپے 56 پیسے فی لیٹر  جبکہ  ہائی اسپیڈ ڈیزل کی قیمت 110 روپے 76 پیسے فی لیٹر مقرر کی گئی ہے  اور  مٹی کے تیل کی قیمت 80 روپے فی لیٹر  اور  لائٹ ڈیزل کی قیمت 77 روپے 65 پیسے فی لیٹر مقرر کی گئی ہے۔

 وزارت خزانہ نے قیمتوں کا اعلان کر دیا،  نئی قیمتوں کا اطلاق آج رات 12 بجے سے ہو گا اور  نئی قیمتیں 30 اپریل تک نافذالعمل رہیں گی۔

اس سے قبل   آئل اینڈ گیس ریگولیٹری اتھارٹی(اوگرا) نے  قیمتوں میں کمی کی سمری متعلقہ حکام کو بھجوا دی تھی۔پیٹرولیم ڈویژن حکام  کاکہنا تھا  کہ سمری میں   پیٹرول 2 روپے فی لٹر سستا کرنے کی سفارش کی ہے جبکہ  ڈیزل کی قیمت میں بھی 2 روپے کمی کی تجویز بھجوائی گئی تھی۔

آئل اینڈ گیس ریگولیٹری اتھارٹی (اوگرا) کی جانب سے آئندہ 15 روز کے لیے پیٹرولیم مصنوعات کی قیمتوں میں رد و بدل کی سمری پیٹرولیم ڈویژن حکام کو ارسال کی گئی تھی۔   اوگرا نے اپنی سمری میں عالمی مارکیٹ میں خام تیل کی قیمتوں کو مدنظر رکھتے ہوئے پیٹرولیم لیوی میں اضافہ نہ کرنے کی تجویز دی تھی۔

واضح رہے کہ رواں برس  31 مارچ کو بھی حکومت نے پیٹرول اور ڈیزل کی قیمتوں میں کمی کی تھی۔