کالعدم ٹی ایل پی کے بینک اکاؤنٹس اور اثاثے منجمد کرنے کی کارروائی شروع

تفصیلات کے مطابق  کالعدم تحریک لبیک پاکستان (ٹی ایل پی ) کےبینک اکاؤنٹس اوراثاثےمنجمدکرنےکی کارروائی شروع کردی گئی ہے۔اثاثےمنجمدکیےجانےکی کارروائی انسداددہشتگردی ایکٹ1997کےتحت کی جارہی ہے۔

ذرائع کے مطابق   کالعدم جماعت کےعہدیداروں،کارکنوں کوجاری اسلحہ لائسنسزبھی منسوخ کیےجائیں گے، کالعدم جماعت کےعہدیداروں کےشناختی کارڈاورپاسپورٹ بھی بلاک کیےجارہے ہیں، اثاثےمنجمدکرنےکیلئے اسٹیٹ بینک اورصوبائی محکمہ ریونیوکرداراداکریں گے۔

ذرائع کے مطابق   کالعدم جماعت الیکشن نہیں لڑ سکے گی،  کالعدم جماعت کے ممبران اسمبلی سپریم کورٹ میں اپیل دائر کریں گے، سپریم کورٹ میں اپیل کے بعد فیصلہ ہو گا کہ ممبران اسمبلی آزاد حیثیت سے اسمبلی کا حصہ رہ سکے گے یا نہیں۔

قبل ازیں  وزارت داخلہ نے تحریک لبیک پاکستان ( ٹی ایل پی) کو کالعدم قرار دے دیا تھا۔ وزارت داخلہ کیجانب سے تحریک لبیک پاکستان پر پابندی کا نوٹیفکیشن جاری کردیا ہے۔ انسداد دہشت گردی ایکٹ 1997کے تحت تحریک لبیک پاکستان کو کالعدم قرار دیا گیا ہے۔

نوٹیفکیشن میں کہا گیا ہے کہ  تحریک لبیک پاکستان ملک میں دہشت گردی اور دوسرے گھناؤنے جرائم میں ملوث ہے۔ تحریک لبیک پاکستان  ملک میں لوگوں کواکسا کر انتشار پیدا کرنے میں ملوث ہے اس کے ساتھ ساتھ قانون نافذ کرنے والے اداروں کے اہلکاروں کی اموات اور زخمی کرنے میں بھی  ملوث ہے۔