حکومت نے حج سپانسر شپ اسکیم میں آئندہ جمعہ تک توسیع کردی

اسلام آباد: حکومت نے حج اسپانسر شپ اسکیم میں آئندہ جمعہ تک توسیع کردی ہے جب کہ باقاعدہ حج اسکیم کے تحت درخواستیں وصول کرنے کی تاریخ آج ختم ہوگئی۔

وزارت مذہبی امور اور بین المذاہب ہم آہنگی کے مطابق حج اسپانسر شپ اسکیم کی تاریخ میں توسیع کا فیصلہ بیرون ملک مقیم پاکستانیوں کو اس مقصد کے لیے رقوم کی منتقلی میں درپیش مشکلات کے پیش نظر کیا گیا ہے۔

یہ بات قابل ذکر ہے کہ اسپانسر شپ حج سکیم کے تحت تمام درخواست دہندگان کو بغیر قرعہ اندازی کے کامیاب قرار دیا جائے گا۔

وزارت نے حج درخواست دہندگان کو مزید معلومات اور عمل کے لیے نامزد بینکوں سے رابطے میں رہنے کا مشورہ دیا۔

دریں اثنا، تمام کمرشل بینکوں کی نامزد برانچیں کل اور اتوار کو صبح 9 بجے سے دوپہر 2 بجے تک عازمین حج سے حج درخواستیں جمع کرنے کے لیے کھلی رہیں گی۔

قبل ازیں وزیر خزانہ اسحاق ڈار نے حکومت کی جانب سے اس سال عازمین حج کو زیادہ سے زیادہ سہولتیں فراہم کرنے کے عزم کا اظہار کیا۔

اسلام آباد میں وزیر برائے مذہبی امور و بین المذاہب ہم آہنگی مفتی عبدالشکور سے ملاقات میں انہوں نے حج پالیسی 2023 پر پیش رفت پر بھی تبادلہ خیال کیا۔