عید کی تعطیلات کے دوران عمران خان کو ہراساں نہ کرنے کا حکم

اسلام آباد ہائی کورٹ نے عید الفطر کی چھٹیوں کے دوران عمران خان کو ہراساں نہ کرنے کا حکم دے دیا۔چیئرمین پی ٹی آئی عمران خان کی جانب سے عید کے دوران گرفتاری روکنے اور مقدمات کی تفصیلات کی درخواست پر سماعت  اسلام آباد ہائی کورٹ میں ہوئی، جہاں چیف جسٹس عامر فاروق کے روبرو درخواست گزار عمران خان کی جانب سے ایڈووکیٹ فیصل چوہدری پیش ہوئے۔

عمران خان کے وکیل نے عدالت کو بتایا کہ سراج الحق زمان پارک آئے، مذاکرات کی اچھی کاوش ہوئی۔ اگلی صبح ہم نے دیکھا کہ سندھ کے ہمارے صدر کو اٹھا لیا گیا۔چیف جسٹس نے ریمارکس دیے کہ اِس واقعے سے ظاہر ہے ایک بیڈ ٹیسٹ پیدا ہوا۔

فیصل چوہدری نے کہا کہ ہمیں خدشہ ہے عید کی 5 چھٹیوں میں یہ پھر کوئی آپریشن کریں گے، جس پر چیف جسٹس نے ریمارکس دیے کہ مقدمات کی تفصیلات تو طلب کر سکتا ہوں میں اور کوئی خالی آرڈر کیسے کروں؟۔

بعد ازاں عدالت نے عید کی چھٹیوں میں عمران خان کو ہراساں نہ کرنے کا حکم دیتے ہوئے عمران خان کی درخواست پر حکومت کو نوٹس جاری  کردیا اور کیسز کی تفصیلات طلب کرلیں۔ اسلام آباد ہائی کورٹ نے عمران خان کی درخواست عید کے بعد تک زیر التوا ہی رکھنے کی استدعا منظور  کرتے ہوئے درخواست 27 اپریل کو دوبارہ سماعت کے لیے مقررکرلی۔