شاہد خاقان عباسی نے وزیراعظم کی گرفتاری کا مطالبہ کردیا

تفصیلات کے مطابق اسلام آباد کی احتساب عدالت کے باہر میڈیا سے گفتگو کرتے ہوئے مسلم لیگ ن  کے رہنما اور سابق وزیر اعظم شاہد خاقان عباسی نے کہا کہ آج ملک کے عوام  شناختی کارڈ لے کر چینی حاصل کرنے کے لیے لائنوں میں کھڑے ہونے پر مجبور ہیں ۔ پاکستان کی 40 فیصد چینی پیدا کرنے والوں  کو نیب بلائیں، وزیرِ اعظم اور وزیروں کو بلائیں، ان پر نیب کیس بنائیں اور جیل میں ڈالیں کیونکہ انصاف کا تقاضا تو یہی ہے۔

انہوں نے کہا کہ حکومت کی کوئی پالیسی نہیں، عوام مشکل میں ہیں، پاکستان واحد ملک ہے جہاں عوام اپنے پیسوں سے کورونا وائرس کی ویکسین لگوا رہے ہیں۔ حکومت ایک ٹیکہ نہیں خرید سکی ۔ بدنصیبی ہے کہ پاکستان میں کورونا وائرس بڑھتا جا رہا ہے، دنیا کورونا وائرس پر قابو پا رہی ہے اور ہمارے ہاں کورونا کیسز بڑھ رہے ہیں۔ این سی او سی ناکام ہو چکی اسے بند کریں۔ وہ وقت دور نہیں کہ پاکستانیوں کو بیرونِ ملک سفر سے منع ہی کر دیا جائے ۔

انہوں نے کہا کہ شہباز شریف پر ابھی تک کوئی الزام ثابت نہیں ہوسکا، وزیراعظم اور کابینہ کو بھی ڈیڑھ سال جیل میں ڈالیں پھر پتہ چلے گا۔

شاہد خاقان عباسی کاکہنا تھا   کہ صحافت بھی دھمکیوں، دباؤ اور جانی خطرے کی زد میں ہے، جس طرح معیشت، خارجہ پالیسی، پارلیمان زوال پذیر ہے اسی طرح صحافت بھی جانی خطرے کے تحت چل رہی ہے،  ہم کل قومی اسمبلی میں یہ معاملہ اٹھائیں گے۔انہوں نے مزید کہا کہ جو اسپیکر ناموسِ رسالت کی بات نہ کرنے دے وہ صحافت کی آزادی پر بھی بات نہیں کرنے دے گا۔ نوٹس کے معاملے پر سابق وزیراعظم کاکہنا تھا کہ   میں صرف ایک ذات سے معافی مانگتا ہوں، اسپیکر یا کسی اور سے نہیں۔