ترکیہ انتخابات: تیسرے امیدوار اوغان نے طیب اردوان کی حمایت کر دی

ترکیہ میں صدارتی انتخابات میں تیسرے نمبر پر رہنے والے امیدوارسنان اوغان نے دوسرے مرحلے میں صدر رجب طیب اردوان کی حمایت کردی ہے جس سے حزبِ اختلاف کے امیدوار کمال کلیچ داراوغلو کو درپیش چیلنجز میں اضافہ ہوا ہے۔سنان اوغان نے 14 مئی کو منعقدہ صدارتی انتخابات کے ابتدائی مرحلے میں 5.2 فی صد ووٹ حاصل کیے تھے ۔

غیر ملکی خبر رسان ایجنسی کے مطابق اوغان نے انقرہ میں ایک نیوز کانفرنس میں صدرطیب اردوان کی حمایت کا اعلان کیا ہے اور کہا کہ ان کی مہم نے ترک قوم پرستوں کو سیاست میں ’’کلیدی کھلاڑی‘‘ بنا دیا ہے۔

صدر اردوان نے 14 مئی کو 49.5 فی صد ووٹ حاصل کیے تھے جبکہ ان کے مدمقابل حزب اختلاف کے مشترکہ امیدوار کلیچ داراوغلو نے 44.9 فی صد رائے دہندگان کی حمایت حاصل کی۔تاہم حکمراں جماعت آق کے زیرقیادت اتحاد نے پارلیمان میں اکثریت حاصل کرلی ہے جس سے صدر اردوان کو فائدہ ہوگا۔

پچپن سالہ سابق ماہر تعلیم اوغان وکٹری پارٹی کے سربراہ ہیں۔ وہ دائیں بازو کی جماعتوں پرمشتمل اتحاد کے پہلے مرحلے میں صدارتی امیدوار تھے۔یہ اتحاد پناہ گزینوں کے دنیا میں سب سے بڑے میزبان ملک ترکیہ میں تارکینِ وطن مخالف مؤقف کی وجہ سے جانا جاتا ہے۔

دوسری جانب صدر اردوان نے کہا ہے کہ انتخابات کے دوسرے مرحلے میں ان کے حق میں ووٹ دراصل ملک کے استحکام کے لیے ووٹ ہے۔تجزیہ کاروں کا کہنا ہے کہ اوغان کی حمایت سے طیب اردوان کو تقویت ملے گی لیکن خود ان کے حامیوں میں پھوٹ پڑسکتی ہے۔ وکٹری پارٹی منگل کے روز انتخابات کے بارے میں الگ سے اپنے مؤقف کا اعلان کرے گی۔