قوم کو وطن عزیز کیلئے جانوں کا نذرانہ پیش کرنے والے شہداء پر فخر ہے:صدر/وزیراعظم

اسلام آباد: صدر ڈاکٹر عارف علوی، وزیراعظم شہبازشریف اور تینوں مسلح افواج کے سربراہوں نے یوم تکریم شہداء پاکستان کے موقع پر اپنے پیغامات میں ان شہداء کو زبردست خراج عقیدت پیش کیا ہے جنہوں نے قوم اوروطن عزیز کے وقار، خودمختاری اورسلامتی کے لئے اپنے فرائض کی ادائیگی کے دوران جانوں کا نذرانہ پیش کیا۔

صدرنے اپنے پیغام میں کہا کہ ساری قوم کو اپنے بہادرشہداء پرفخر ہے جنہوں نے تاریخ میں آزمائش کی ہرگھڑی پر جرأت اور حب الوطنی کے جذبے کامظاہرہ کیا۔وزیراعظم نے اپنے ٹوئیٹ میں بچوں سمیت عوام پرزوردیاکہ وہ شہداء کے مزاروں اور یادگاروں پر جائیں اوراحترام اورمحبت کے جذبے کے اظہار کے لئے پھول نچھاورکریں۔

انہوں نے کہاکہ ہمیں د نیا کے سامنے یہ ثابت کرنا چاہیے کہ ہم وہ قوم ہیں جس کو اپنے شہداء سے والہانہ عقیدت اورمحبت ہے۔ پاک فوج کے شعبہ تعلقات عامہ کے مطابق جوائنٹ چیفس آف سٹاف کمیٹی کے چیئرمین، سروسزچیف ،سابق سروسز افسران اور سول سوسائٹی کے نمائندوں نے بھی شہداء پاکستان کو زبردست خراج عقیدت پیش کیا۔

اپنے پیغامات میں انہوں نے کہا کہ شہداء کی قربانیاں لازوال ہیںجو ہماری آنے والی نسلوں کے لئے ہمیشہ مشعل راہ رہیں گی۔ انہوں نے کہا کہ پاکستان کے دشمنوں کے مذموم پروپیگنڈے کے باوجود شہداء کی قربانیوں کو ہرگز فراموش نہیں کیاجائے گا۔