جی ایچ کیو میں یوم شہداء پاکستان کی تقریب کا انعقاد

اسلام آباد: یوم تکریم شہداء پاکستان کے حوالے سے ایک اہم تقریب جنرل ہیڈ کوارٹرز (جی ایچ کیو) میں جاری ہے۔

تفصیلات کے مطابق چیف آف آرمی سٹاف جنرل سید عاصم منیر تقریب کے مہمان خصوصی ہیں۔

تقریب میں مسلح افواج کے موجودہ حاضر سروس اور ریٹائرڈ افسران بھی شریک ہیں جن میں سابق آرمی چیف جنرل (ر) قمر جاوید باجوہ، سابق چیئرمین جوائنٹ چیفس جنرل ندیم رضا اور دیگر ریٹائرڈ افسران بھی شامل ہیں۔

تقریب میں چیئرمین رویت ہلال کمیٹی مولانا عبدالخبیر آزاد، مفتی منیب الرحمان، قومی کرکٹ ٹیم کے کپتان بابر اعظم سمیت زندگی کے مختلف شعبوں سے تعلق رکھنے والی شخصیات بھی موجود تھیں۔

تقریب کا آغاز تلاوت قرآن پاک سے کیا گیا جس کے بعد قومی ترانہ پڑھا گیا۔

آرمی چیف جنرل عاصم منیر نے یادگار شہداء پر حاضری دی، پھول چڑھائے، آیات پاک کی تلاوت کی اور شہداء کے بلندی درجات کے لیے دعا کی۔

تقریب میں موجود شہداء کے اہل خانہ اور سکول کے بچوں نے شہداء کی یادگار پر پھول چڑھائے۔

دوسری جانب پاک فضائیہ (پی اے ایف)، پاک بحریہ کے ہیڈ کوارٹرز، فارمیشن ہیڈ کوارٹرز اور پولیس شہداء کی یادگاروں پر بھی تقریب کا انعقاد کیا جائے گا۔