وزیراعظم محمد شہباز شریف کا عالمی اور قومی سطح پر پلاسٹک کی آلودگی پر قابو پانے کی ضرورت پر زور

اسلام آباد: وزیراعظم محمد شہباز شریف نے عالمی اور قومی سطح پر پلاسٹک کی آلودگی پر قابو پانے کی ضرورت پر زور دیتے ہوئے شہریوں، کاروباری اداروں، سول سوسائٹی کی تنظیموں اور میڈیا سمیت تمام متعلقہ فریقوں سے کہا ہے کہ وہ پلاسٹک کی آلودگی کے خلاف جنگ اور آنے والی نسلوں کیلئے کرہ ارض کی حیاتیاتی تنوع کے تحفظ کیلئے اپنے عزم کی تجدید کریں۔

اتوار کو عالمی یوم ماحولیات پر اپنے پیغام میں وزیراعظم نے کہا کہ پاکستان کو وسائل کے پائیدار استعمال کی راہ پر گامزن کرنے کیلئے متعدد اقدامات کئے ہیں۔

انہوں نے عالمی سطح پر پلاسٹک کی آلودگی کا حل کے عنوان سےپلاسٹک کی آلودگی کو ختم کرنے پر مبنی مہم کے ذریعے پلاسٹک کی آلودگی سے نمٹنے کی فوری ضرورت پر زور دیا۔ وزیراعظم نے پلاسٹک کی آلودگی سے نمٹنے اور پلاسٹک کے استعمال میں کمی لانے کے پاکستان کے غیر متزلزل عزم کا اعادہ کیا۔

انہوں نے کہا کہ پاکستان پلاسٹک کی آلودگی کے حوالے سے دس سرفہرست ممالک میں شامل ہے اورایک اندازے کے مطابق 70 فیصد پلاسٹک کے فضلہ کو غلط طریقہ سے ٹھکانے لگایا جاتا ہے۔