ڈونلڈ ٹرمپ کو 37 الزامات کا سامنا، خفیہ دستاویزات کیس میں دوبارہ فرد جرم عائد

واشنگٹن: سابق امریکی صدر ڈونلڈ ٹرمپ کو جاسوسی ایکٹ کی خلاف ورزی کے 37 الزامات کا سامنا ہے۔

غیر ملکی میڈیا کے مطابق ڈونلڈ ٹرمپ کو جوہری پروگرام سے متعلق معلومات کے غیر قانونی حصول، جاسوسی، خفیہ دستاویزات کی غلط ہینڈلنگ اور دیگر الزامات کا سامنا ہے۔

49 صفحات پر مشتمل فرد جرم کی سنسنی خیز تفصیلات سامنے آگئیں، جس کے مطابق مبینہ طور پر غیر قانونی طور پر قبضے میں لی گئی دستاویز میں جوہری پروگرام، حملوں کی منصوبہ بندی کی معلومات بھی تھیں۔

ان فائلوں میں فوجی حملے کی صورت میں امریکہ کی کمزوریوں کے بارے میں بھی اہم معلومات موجود تھیں، اگر ڈونلڈ ٹرمپ کے خلاف تمام الزامات ثابت ہو گئے تو انہیں مجموعی طور پر 100 سال قید کی سزا ہو سکتی ہے۔

گزشتہ روز سابق امریکی صدر ٹرمپ پر خفیہ دستاویزات کیس میں دوبارہ فرد جرم عائد کر دی گئی۔

پراسیکیوٹر جیک اسمتھ نے کہا کہ قانون کے تحت سب برابر ہیں، ٹرمپ دستاویزات کیس کی جلد سماعت ہونی چاہیے۔