جسٹس قاضی فائز عیسٰی نظر ثانی کیس، عدالت نے درخواست منظور کر لی

 تفصیلات کے مطابق جسٹس عمر عطاء بندیال کی سربراہی میں سپریم کورٹ کے 10 رکنی بینچ نے جسٹس قاضی فائز عیسٰی نظر ثانی کیس کی سماعت کی۔جس میں جسٹس یحییٰ آفریدی نے قاضی فائز عیسٰی کی نظر ثانی درخواست منظور نہیں کی،جسٹس یحییٰ آفریدی نے ریفرنس کیخلاف قاضی فائز عیسٰی کی مین اپیل بھی مسترد کی تھی۔

جسٹس قاضی فائز عیسیٰ کی نظرثانی درخواست پر فیصلہ 5-5 سے برابر جبکہ سرینا عیسیٰ کی نظرثانی درخواست 4-6 سے منظور کر لی گئی ۔

جسٹس منظور ملک اور جسٹس مظہر عالم میاں خیل نے اپنا فیصلہ تبدیل کیا ۔بنچ میں شامل ہونے والے نئے جج جسٹس امین الدین خان نے بھی نظرثانی درخواستوں کے حق میں فیصلہ دیا ہے۔

یاد رہے کہ جسٹس فائز عیسیٰ انکی اہلیہ اور دیگر درخواست گزاروں نے 19 جون 2020 کے فیصلے پر نظر ثانی کی اپیل دائر کی تھی۔درخواستوں میں جسٹس فائز عیسٰی کے اہل خانہ کی جائیدادوں کی ایف بی آر سے تحقیقات کے فیصلہ پر نظر ثانی کی اپیل کی گئی تھی۔

سپریم کورٹ نے 19 جون 2020 کو جسٹس قاضی فائز عیسٰی کیخلاف صدارتی ریفرنس پر فیصلہ سنایا تھا۔سپریم کورٹ نے جسٹس قاضی فائز عیسٰی کیخلاف ریفرنس کو کالعدم قرار دیدیا تھا۔سپریم کورٹ نے اہل خانہ کی جائیدادوں کا معاملہ ایف بی آر کو بھجوا دیا تھا۔