وزیر خزانہ اسحاق ڈار نے آئی ایم ایف کے سامنے گھٹنے ٹیک دیئے ہیں،شاہ محمود قریشی

لاہور کی انسداد دہشت گردی عدالت نے سابق وزیر خارجہ شاہ محمود قریشی کی جناح ہاؤس حملے سیمت تین مقدمات میں عبوری ضمانت میں 7 جولائی تک توسیع کر دی ہے۔

انسداد دہشت گردی عدالت کے جج اعجاز احمد بٹر نے ضمانت کی درخواستوں پر سماعت کی۔ عبوری ضمانت کی معیاد ختم ہونے پر شاہ محمود قریشی عدالت میں پیش ہوئے۔

وکیل نے مؤقف اختیار کیا کہ شاہ محمود قریشی کو بے بنیاد مقدمات میں شامل کیا گیا، وہ اپنے خلاف مقدمات میں اپنی بے گناہی ثابت کرنے کیلئے تفتیش میں شامل ہونا چاہتے ہیں۔ ان کی ضمانت منظور کی جائے،عدالت نے مقدمہ کا ریکارڈ طلب کرتے ہوئے عبوری ضمانت میں سات جولائی تک توسیع کر دی۔

عدالت کے باہر میڈیا سے گفتگو میں شاہ محمود قریشی نے کہا کہ آج یا کل میں آئی ایم ایف کا پول بھی کھلنے والا ہے، وزیر خزانہ اسحاق ڈار کو گھٹنے ٹیکنے پڑے، 22 فیصد شرح سود کے ساتھ کون اس ملک میں سرمایہ کاری کرے گا۔ جو بجٹ پاس ہوا اس کو سب نے دیکھا ہے، پاکستان کا شہری پوچھ رہا ہے کیا میرے معاشی حالات کی کوئی بات کررہا ہے، تحریک انصاف کی کوشش ہے وہ مستقبل کی بات کرے، جیل سے جب سے رہا ہوا ہوں شخصیات پر بات نہیں کررہا۔

پاکستان تحریک انصاف کے وائس چیئرمین شاہ محمود قریشی نے کہا ہےکہ دبئ کی بیٹھک پیپلز پارٹی اور مسلم لیگ ن حصول اقتدار کے لیے تھی۔ دبئی میں وزارت عظمی کے خواہشمندوں کا اجتماع ہو رہا ہے،نواز شریف، مریم، زرداری اور بلاول وزیر اعظم بننا چاہتے ہیں۔ جس طرف ملک جا رہا ہے، اس کی ان کو کوئی پرواہ نہیں ہے۔

بھارتی الزامات کے حوالے سے شاہ محمود قریشی نے کہا کہ بھارت کے وزیراعظم کے بیان پر کسی نے اس کو جواب نہیں دیا، نریندر مودی کہتا ہے پاکستان اپنی موت آپ مررہا ہے، افسوس وزیراعظم پاکستان اس بیان پر خاموش ہیں