اینٹی نارکوٹکس فورس کی ملک گیر انسدادمنشیات کارروائیاں ،بھاری مقدار میں منشیات برآمد

راولپنڈی: اینٹی نارکوٹکس فورس نے ملک گیر انسدادمنشیات کارروائیوں کے دوران بھاری مقدار میں منشیات برآمدکرلیں ۔اے این ایف ہیڈکوارٹر راولپنڈی سے جاری بیان کے مطابق اے این ایف اسلام آباد ایئرپورٹ پر پرواز نمبر ER-703 کے ذریعے شارجہ جانے والے بنوں کے رہائشی ملزم سے 1کلو 694 گرام چرس برآمدکی گئی ۔برآمدہ منشیات ملزم کے بیگ میں چھپائی گئی تھی۔

ترنول پھاٹک پر کارروائی کرتے ہوئے رکشہ اور گاڑی سمیت اسلام آباد اور پشاور کے رہائشی 3ملزمان گرفتارکیے گئے، گرفتار ملزمان سے مجموعی طور پر 11کلو چرس برآمد کی گئی ۔کوئٹہ کے علاقے لکپاس کے قریب گاڑی میں چھپائی گئی 10کلو چرس اور 5کلو آئس برآمد کر کے مستونگ کا رہائشی ملزم گرفتارکیاگیا ۔برآمدہ منشیات دالبندین سے کوئٹہ سمگل کی جا رہی تھی۔ لاہور میں واقع جی پی او آفس میں آسٹریلیا بھیجے جانیوالے 13 عدد خواتین کے کپڑوں پر مشتمل پارسلز سے 1کلو 50گرام آئس برآمد کی گئی۔

برآمدہ آئس کپڑوں میں جذب کی گئی تھی۔شہاب پورہ سیالکوٹ کے قریب سیالکوٹ کے رہائشی دو موٹر سائیکل سواروں کے قبضے سے 2 کلو 400 گرام چرس برآمد کی گئی۔ ڈیرہ غازی خان ملتان کے قریب شیخوپورہ کی رہائشی خاتون کے ذاتی قبضے سے 3کلو چرس اور 3کلو آئس برآمد کی گئی۔ ترجمان اے این ایف نے بتایا کہ تمام ملزمان کے خلاف انسدادِمنشیات ایکٹ کے تحت مقدمات درج کر کے تحقیقات کا آغاز کر دیا گیا ہے ۔