این اے 249 ضمنی انتخاب: پیپلزپارٹی نے میدان مار لیا

تفصیلات کے مطابق این اے 249  حلقے کے  276 پولنگ اسٹیشنز کے غیر حتمی اور غیرسرکاری نتائج کے مطابق پیپلز پارٹی کے  قادر خان مندوخیل  نے 16 ہزار 156 ووٹ حاصل کیے۔ مسلم لیگ ن کے مفتاح اسماعیل 15 ہزار 473 ووٹ لے کر دوسرے نمبر پر رہے جبکہ  کالعدم تحریک لبیک پاکستان (ٹی ایل پی) کے مفتی نذیر احمد کمالوی 11 ہزار 125 ووٹ  حاصل کر کے تیسرے نمبر پر رہے۔ پاک سر زمین پارٹی کے سربراہ سید مصطفیٰ کمال چوتھے نمبر پر 9 ہزار 227 ووٹ  حاصل کرسکے اور اس سے قبل اس حلقے سے کامیاب ہونے والی پارٹی پاکستان تحریک انصاف(پی ٹی آئی) محض 8 ہزار 922 ووٹ کے ساتھ پانچویں نمبر پر آئی۔

ضمنی انتخاب میں اپنی جماعت کی کامیابی پر پاکستان پیپلز پارٹی بلاول بھٹو زرداری نے صرف ایک جملے میں اپنے پیغام دیا 'شکریہ کراچی #NA249

Thank you Karachi. #NA249 pic.twitter.com/LwZGlvoH0k

— BilawalBhuttoZardari (@BBhuttoZardari) April 29, 2021

دوسری جانب مسلم لیگ (ن) اور پی ٹی آئی نے ضمنی انتخاب کا نتیجہ مسترد کردیا ہے ۔ مسلم لیگ ن کی نائب صدر مریم نواز نے کہا کہ چند سو ووٹوں سے ن لیگ کا الیکشن چرایا گیا ہے۔انہوں نے کہا کہ الیکشن کمیشن متنازع الیکشن کےنتائج کو روکے، اگر  نتیجہ نہ بھی روکا پھر بھی یہ عارضی نتیجہ ہوگا۔ ان کا کہنا تھا کہ ووٹ کو عزت مل رہی ہے اور مل کر رہے گی۔

واضح رہے کہ یہ نشست  حالیہ سینیٹ انتخابات میں کامیابی کے بعد پی ٹی آئی کے فیصل واوڈا  کے استعفی دینے کے بعد خالی ہوئی تھی ۔ 2018 کے عام انتخاب میں ن لیگ کے شہباز شریف اس حلقے سے دوسرے نمبر پر آئے تھے۔ 2018 میں ہونے والے عام انتخابات میں اس حلقے میں تین جماعتوں تحریک انصاف، مسلم لیگ ن اور تحریک لبیک (ٹی ایل پی) کے مابین مقابلہ ہوا تھا۔