نسلہ ٹاور کیس: سابق ڈی جی سندھ منظور قادر گرفتار

کراچی: کراچی میں نسلہ ٹاور کا غیر قانونی نقشہ پاس کرانے میں ملوث سابق ڈائریکٹر جنرل (ڈی جی) سندھ بلڈنگ کنٹرول اتھارٹی منظور قادر عرف کاکا کو عدالت نے عبوری ضمانت منسوخ کرتے ہوئے گرفتار کرلیا۔

تفصیلات کے مطابق سپریم کورٹ نے کراچی کی رہائشی عمارت نسلہ ٹاور کی تعمیر کو غیر قانونی قرار دے دیا جس کے بعد عدالتی حکم پر عمارت کو 2022 میں گرا دیا گیا۔

اسپیشل جج صوبائی اینٹی کرپشن کی عدالت میں سابق ڈی جی سندھ بلڈنگ کنٹرول اتھارٹی منظور قادر کی عبوری ضمانت میں توسیع کی درخواست پر سماعت ہوئی۔

سرکاری وکیل نے موقف اختیار کیا کہ منظور کاکا نے نسلہ ٹاور کا نقشہ غیر قانونی طور پر پاس کرایا۔ اس پر اور دیگر ملزمان پر نسلہ ٹاور کی زمین 700 گز سے بڑھا کر 1100 مربع گز کرنے کا الزام ہے۔

ملزم کے وکیل نے کہا کہ منظور قادر پر لگائے گئے الزامات جھوٹے ہیں، ان کی عبوری ضمانت میں توسیع کی جائے۔

عدالت نے فریقین کے وکلاء کے دلائل سننے کے بعد عبوری ضمانت میں توسیع سے متعلق فیصلہ محفوظ کر لیا۔

بعد ازاں عدالت نے محفوظ فیصلہ سناتے ہوئے ملزمان منظور قادر اور خیر محمد کی عبوری ضمانتیں منسوخ کرتے ہوئے انہیں نظر بند کرنے کی ہدایت کردی۔

سابق ڈی جی سندھ بلڈنگ کنٹرول اتھارٹی کو عدالت کے احاطے سے گرفتار کر لیا گیا۔ سپریم کورٹ نے نسلہ ٹاور کی غیر قانونی تعمیر کا نوٹس لیتے ہوئے مقدمہ درج کرنے کا حکم دے دیا۔