نامزد نگران وزیر اعظم انوار الحق کاکڑ سینٹ کی رکنیت سے مستعفی

نامزد نگران وزیر اعظم انوار الحق کاکڑ نے سینٹ کی رکنیت سے استعفی دے دیا،انہوں نے اپنا استعفی سینٹ چیئرمین صادق سنجرانی کو بھجوا دیا۔انوار الحق کاکڑ ملک کے 8 ویں نگراں وزیر اعظم کی حیثیت سے عہدے کا حلف آج اٹھائیں گے 

نگراں وزیراعظم انوارالحق کاکڑ کی حلف برداری کی تقریب آج سہ پہر3 بجے ایوان صدر میں ہوگی، صدر مملکت ڈاکٹر عارف علوی نامزد وزیراعظم سے حلف لیں گے۔

ذرائع کا کہنا تھا کہ حلف برداری کی تقریب میں وزیراعظم شہباز شریف بھی شریک ہوں گے جب کہ تقریب میں شرکت کے دعوت نامے جاری کردیے گئے ہیں۔

چیئرمین جوائنٹ چیفس آف اسٹاف کمیٹی جنرل ساحر شمشاد مرزا سمیت تینوں سروسز چیفس کو بھی دعوت نامے بھجوا دیے گئے ہیں۔

چیف جسٹس آف پاکستان جسٹس عمر عطاء بندیال، چیف الیکشن کمشنر سکندر سلطان راجہ، چیئرمین سینیٹ صادق سنجرانی، اسپیکر قومی اسمبلی راجہ پرویز اشرف اور چاروں صوبائی گورنرز کو بھی تقریب میں مدعو کیا گیا ہے۔

اس کے علاوہ نگراں وزیراعظم کی حلف برداری کی تقریب میں سابق وفاقی کابینہ کے اراکین کی شرکت بھی متوقع ہے۔

ذرائع کا کہنا ہے کہ نامزد وزیراعظم انوار الحق کاکڑ حلف برداری کے فوری بعد وزیراعظم ہاؤس پہنچیں گے۔

نگراں کابینہ سے متعلق ذرائع کا کہنا تھا کہ نگراں وزیراعظم اگلے 2 سے 3 دن میں اپنی کابینہ کو حتمی شکل دیں گے، سابق وزیرخزانہ اسحاق ڈار کو نگراں کابینہ میں وزارت خزانہ کا قلمدان جبکہ سابق سیکرٹری خارجہ جلیل عباس جیلانی کو وزیر خارجہ بنائے جانے پر غور کیا جارہا ہے۔