جناح ہاؤس حملہ کیس میں نامزد پی ٹی آءی رہنما یاسمین راشد کی طبیعت ناساز

جناح ہاوس حملے میں نامزد ملزمہ تحریک انصاف کی رہنما ڈاکٹر یاسمین راشد کی طبیعت ناساز، دل کی تکلیف کی شکایت پر پنجاب انسٹیٹیوٹ آف کارڈیالوجی منتقل کیا گیا جہاں ڈاکٹروں نے ان کا مکمل معائنہ کیا۔

تفصیلات کے مطابق یاسمین راشد کی جیل میں طبیعت ناساز ہوگئی، جس پر انہیں پنجاب انسٹیٹیوٹ آف کارڈیالوجی منتقل کردیا گیا۔ اور پنجاب انسٹیٹیوٹ آف کارڈیالوجی کے ڈاکٹروں نے ان کا معائنہ کیا، ان کا ایکوکارڈیو گرافی ٹیسٹ بھی کیا گیا۔

یاسمین راشد کو 2 گھنٹے تک پنجاب انسٹیٹیوٹ آف کارڈیالوجی میں رکھا گیا ، اور ایکو کارڈیو گرافی ٹیسٹ ٹھیک آنے پر انہیں واپس جیل بھجوا دیا گیا۔

واضح رہے کہ نو مئی کو پاکستان تحریک انصاف کے چیئرمین عمران خان کی گرفتاری پر ملک گیر پُرتشدد احتجاج کیا گیا جس میں قومی املاک کو نقصان پہنچایا گیا، شرپسندوں نے فوجی تنصیبات کو بھی نشانہ بنایا۔ جس کے بعد پی ٹی آئی کے کئی رہنما اور کارکنان گرفتار ہیں اور انھیں متعدد مقدمات کا سامنا ہے