ایئرچیف کی امریکی سفیر ڈونلڈ بلوم سے ملاقات ، دفاعی تعاون پر تبادلہ خیال کیا

اسلام آباد: امریکہ کے سفیر ڈونلڈ بلوم نے پاک فضائیہ کے سربراہ ایئر چیف مارشل ظہیر احمد بابر سدھو سے اسلام آباد میں ملاقات کی، اور دفاعی تعاون پر تبادلہ خیال کیا۔

ملاقات کے دوران فریقین نے دونوں ممالک کے درمیان تربیت کو بہتر بنانے اور پیشہ وارانہ صلاحیتوں کو مزید نکھارنے پر خصوصی توجہ مرکوز کرتے ہوئے دونوں ممالک کی افواج کے درمیان موجودہ تعلقات کو مزید توسیع دینے کے عزم کا اظہار کیا۔

اِس موقع پر گفتگو کرتے ہوئے فضائیہ کے سربراہ نے کہا کہ پاکستان امریکہ کے ساتھ اپنے سفارتی، اقتصادی اور دفاعی تعلقات کو انتہائی اہمیت دیتا ہے جو علاقائی امن، سلامتی اور استحکام سے متعلق تمام اہم امور کے بارے میں اتفاق رائے پر مبنی ہیں۔

ملاقات کے دوران امریکی سفیر نے پاک فضائیہ کے اہلکاروں کی پیشہ ورانہ صلاحیتوں کی تعریف کی اور ادارے کو خود کفیل بنانے کیلئے شاندار اقدامات کو سراہا۔