عراقی صدر کی سعودی ایران خفیہ مذاکرات کی تصدیق

غیر ملکی خبر رساں ادارے کے مطابق  عراق کے صدر بہرام صالح نے سعودی ایران خفیہ مذاکرات کی تصدیق کردی ہے۔عراق کے صدر بہرام صالح کا کہنا ہے کہ  عراق نے ایران اور سعودی عرب کے درمیان مذاکرات کے کئی ادوار کی میزبانی کی ہے۔

عراقی صدر بہرام صالح نے ایران اور سعودی عرب مذاکرات کے متعلق تفصیلات نہیں بتائیں ،اس کے علاوہ مذاکرات کے کتنے ادوار ہوئے؟  عراقی صدر کا درست تعداد بتانے سے بھی انکار کردیا۔

عراقی صدر بہرام صالح نے کہا کہ  خواہش ہے ایران امریکا دشمنی کو بھی ختم ہوتے دیکھوں۔سفارتی حلقوں کا کہنا ہے کہ   روایتی حریفوں ایران اور سعودی عرب کے درمیان  براہ راست مذاکرات سے مشرق وسطیٰ میں سکون کی امید ہے۔

چند روز قبل  سعودی ولی عہد محمد بن سلمان نے مقامی نیوز ایجنسی کو انٹرویو دیا تھا جس میں  سعودی ولی عہد نے ایران کیساتھ اچھے تعلقات کی خواہش کا اظہار کیا تھا۔

سعودی ولی عہد محمد بن سلمان نے کہا تھا کہ  ایران ہمارا ہمسایہ ملک ہے،ہم ایران کیساتھ اچھے اور خاص تعلقات چاہتے ہیں،  ہم ایران کو مشکل میں نہیں بلکہ ترقی دیکھنا چاہتے ہیں،ہم خطے اور دنیاکو استحکام کی جانب لے کر جانا چاہتے ہیں،  بہتر  تعلقات کیلئے سعودی عرب  بین الاقوامی حامیوں  کیساتھ ایران کے منفی رویے کا حل نکالنے کی کوشش کررہاہے۔

واضح رہے کہ عالمی خبر رساں ادارے  میں شائع ہونے والی ایک رپورٹ میں دعویٰ کیا گیا تھا کہ 9 اپریل کو ایران اور سعودی عرب کے سفارت کاروں کے درمیان یمن پر خفیہ مذاکرات ہوئے تھے۔سعودی عرب نے نے ایران کے ساتھ خفیہ مذاکرات کی میڈیا رپورٹ کو بے بنیاد قرار دیدیا تھا۔ دونوں ممالک کے درمیان 2016 سے تعلقات منقطع ہیں جب ریاض میں ایک شیعہ عالم کا سرقلم کیا گیا تھا۔