دریائے ستلج میں اونچے درجے کا سیلاب، متعدد گاؤں زیر آب

دریائے ستلج میں اونچے درجے کا سیلاب،متعدد گاؤں زیر آب آ گئے

دریائے ستلج میں آنے والے سیلاب کے باعث متعدد بند ٹوٹ گئے جس کی وجہ سے کئی گاؤں زیرآب آنے سے دیہاتوں کا زمینی رابطہ منقطع ہو گیا، شہری اپنی مددآپ کے تحت نقل مکانی پر مجبور ہیں۔ بابا فریدپل، موضع ببلانہ، فیروزپور، چستیاں کے علاقے سیلاب سے متاثر ہوئے ہیں، سیکڑوں ایکڑ اراضی زیر آب آگئی جس سے کسان پریشانی کا شکار ہیں۔

سیلابی صورتحال کے پیش نظر مختلف علاقوں میں سرکاری سکولز بند کر دئیے گئے ہیں، 6 سرکاری سکولوں میں تعلیمی سرگرمیاں تاحکم ثانی معطل رہیں گی، بند ہونے والے سکولز میں فلڈ ریلیف کیمپس قائم کیے گئے ہیں، بند ہونے والے سکولز میں ٹبی لال بیگ ،نورا رتھ، جلال جموں، ماڈھو فیروزکا اور سالم رتھ شامل ہیں۔

ستلج میں ہیڈ سلیمانکی کے مقام پر 2لاکھ کیوسک کا سیلابی ریلا آج گزرنے کا امکان ہے ، اس وقت پانی کی آمد 144135کیوسک ہے اور پانی کا اخراج 144135کیوسک ہے، پاک فوج کے دستے امدادی کاروائیوں میں مصروف ہیں، تمام تر امدادی کاروائیوں کی نگرانی ڈپٹی کمشنز اوکاڑہ ذیشان حنیف خود کر رہے ہیں

پاک فوج کا ہزاروں افراد کو سیلاب سے نکالنے اور محفوظ مقامات پر منتقل کرنے کا عمل جاری ہے، ریسکیو ٹیمیں کشتیوں کے ذریعے امدادی سرگرمیوں میں مصروف ہیں۔ ہزاروں متاثرہ افراد میں لگ بھگ 16ٹن مفت راشن بھی تقسیم کیا گیاہے