میچ کے دوران حرکت قلب بند ہونے سے کرکٹر جان کی بازی ہار گیا

تفصیلات کےمطابق شہر قائد میں کرکٹ کھیلتے ایسا ناخوشگوارواقعہ پیش آیا جہاں نوجوان کرکٹر میچ کے دوران دل کا دورہ پڑنے سے انتقال کرگیا، شاہ فیصل کالونی نمبر تین کے 25 سالہ رہائشی حمزہ شاہد اپنے دوستوں کے ساتھ گھر کے قریب نائٹ میچ کھیل رہے تھے کہ وہ بولنگ کرانے کے دوران اچانک زمین پر گر گئے،حمزہ کو اُس کے اہل خانہ ہسپتال لے کر پہنچے جہاں ڈاکٹرز نے موت کی تصدیق کی،ہسپتال کی جانب سے جاری ہونے والے ڈیتھ سرٹیفیکٹ میں حمزہ کی وجہ موت ہارٹ اٹیک بتائی گئی ہے۔

میچ کے دوران حرکت قلب بند ہونے سے کرکٹر جان کی بازی ہار گیا .ویڈیو وائرل !#BreakingNews pic.twitter.com/RHvOSscfA9

— Shehroz Azhar (@shehrozazhar1) May 6, 2021

واضح رہے کہ ایسا ہی ایک واقعہ بھارت میں پیش آیاتھا جہاں میچ کے دوران کریز پرموجود بیٹسمین اچانک گرپڑا اور تکلیف میں ایڑیاں رگڑنے لگا، دیگر کھلاڑیوں نے بھاگ کر سہارا دیا،ساتھی کی حالت بگڑتے دیکھ کر وہاں موجود کھلاڑی اور امپائر اس کی سانس بحال کرنے کی کوشش کی تاہم ناکام رہے۔

اطلاعات کے مطابق بیٹسمین نے امپائر سے باقی گیندوں کی تعداد کے بارے میں پوچھا اور اپنی پوزیشن سنبھالنے کے دوران  اُن کی اچانک طبیعت بگڑی اور وہیں دھڑم سے گرپڑے کچھ ہی پل میں سانس بند ہوگئی۔ساتھی کھلاڑی طبیعت کی اچانک خرابی کے باعث بیٹسمین کو ہسپتال لے آئے مگر ڈاکٹروں نے بتایا کہ وہ دم توڑچکے ہیں۔ڈاکٹروں نے کرکٹر کی موت کی تصدیق کرتے ہوئے ہارٹ اٹیک کو موت کی وجہ قرار دیا۔